Israa'iil oo dishay 5 hoggaamiye oo XMS ah toddobaad gudihiis

QASA (GO) - Garabka hubaysan ee ururka Xamaas Guutada Al-Qassam, ayaa Axaddii ku dhawaaqay geerida afar ka mid ah taliyeyaasha ciidankooda ee ku sugnaa Marinka Qasa, oo uu ku jiro Taliyihii Guutada Waqooyiga ee Qasa, Axmed Al-Ghandour.

Guutada Al-Qassam ayaa bayaan ay ku sheegtay kanaalka ay ku leedahay barta Telegram in afartii taliye ee lagu dilay dagaalkii “Daadadka Al-Aqsa” ay kala ahaayeen Axmed Al-Ghandour, Wael Rajab, Raafat Salman, iyo Ayman Siam.

Al-Ghandour waxa uu ka badbaaday saddex isku day dil oo ay Israa’iil ka dambeysay tan iyo sannadkii 2002-dii, sida ku xusan barnaamijka “La-dagaalanka Xag-jirnimada” ee fadhigiisu yahay Washington.

Xamaas ayaa Sabtidii baroordiiq u dhigtay hoggaamiyaha ururka, Axmed Bahr, oo ahaa ku-simaha madaxa golaha sharci-dejinta ee Falastiin.

Waxa ay tilmaantay in dhimashadiisa ay timid ka dib markii uu ku dhaawacmay duqeymaha ba’an ee ay Israa’iil ku hayso Qasa.

GAROWE ONLINE