Japan iyo Australia oo kala saxiixday heshiis difaaca oo ka dhan ah Shiinaha

Dowladaha Japan iyo Australia ayaa maanta oo khamiis ah kala saxiixday heshiis "taariikh ah" oo lagu xoojinayo hanaanka difaaca, iyaga oo sheegay in heshiiska uu gacan ka geysan doono xasilloonida gobolka, iyadoo Shiinuhu uu ballaarinayo awooddiisa ciidan iyo dhaqaale ee gobolka.

Inkastoo ra'iisul wasaaraha Australia Scott Morrison uusan si toos ah ugu xusin Beijing bayaan uu soo saaray ka hor inta aan la saxiixin, heshiiska ayaa loo arkaa tallaabo kale oo xulafada gobolka ay ku muujinayaan walaaca ay ka qabaan ballaarinta militariga Shiinaha.

Ka hor kulanka Khamiista uu la yeelanayo dhiggiisa Japan Fumio Kishida, Morrison wuxuu ugu yeeray heshiiska "bayaan ay ka go'an tahay laba waddan in ay ka wada shaqeeyaan sidii loo dabooli lahaa caqabadaha amniga iyo istiraatiijiyadeed ee la wadaago ee aan wajaheyno iyo inaan gacan ka geysanno amniga iyo xasilloonida Indo-Pacific."

"Heshiiskan taariikhiga ah wuxuu... markii ugu horeysay bixin doona qaab cad oo lagu wanaajinayo wada shaqaynta iyo iskaashiga ka dhexeeya labadeena ciidan," Morrison ayaa yiri bayaan uu soo saaray.

Wadashaqeyntu waxay ka tarjumaysaa "qiyamka aan wadaagno, go'aankeena dimoqraadiyadda iyo xuquuqda aadanaha, iyo danahayaga guud ee Indo-Pacific oo xor ah, furfuran oo adkaysi leh," ayuu raaciyay.

Japan iyo Australia, oo ay weheliyaan Maraykanka iyo Hindiya, ayaa samaystay isbahaysi ay hoos ugu dhigayaan is baalaarinta milatariga Shiinaha ee gobolka.

Ali Wyne, oo ah falanqeeye sare oo ka tirsan kooxda Eurasia, ayaa sheegay in heshiisku uu kor u qaadi karo awoodda Tokyo iyo Canberra ee ah in ay Japan kor ugu qaado dhoolatus milatari oo ay la wadaagaan Maraykanka.

Sidoo kale bishii Sebtembar, Maraykanka, Ingiriiska, iyo Australia waxay ku dhawaaqeen in ay samaysteen isbahaysi cusub - AUKUS - kaas oo Australia ay ku heli doonto badda hoosteeda tamarta nukliyeerka iyada oo la adeegsanayo tignoolajiyada Maraykanka.

GAROWE ONLINE