Maraykanka oo ka Qaaday Cunaqabatayntii Saarnayd Madaxweynaha Venezuela 

WASHINGTON — Dawladda Maraykanka ayaa Arbacadii shalay ka qaadday cunaqabatayntii saarnayd madaxweynaha ku-simaha ah ee Venezuela, Delcy Rodríguez, sida lagu daabacay bogga xafiiska xakamaynta hantida shisheeye ee wasaaradda khasnadda Maraykanka.

Tallaabadan ayaa loo arkaa calaamad xooggan oo muujinaysa in Maraykanku uu Rodríguez u aqoonsan yahay mas'uul sharci ah oo ka tirsan hoggaanka Venezuela, iyadoo Washington ay horay ugu aqoonsatay madaxda dawladda ee goobaha dublamaasiyadda iyo sharciga. Ilaa hadda dawladda Venezuela kama soo bixin wax jawaab ah oo ku saabsan tallaabadan.

Cunaqabatayn ka qaadistan ayaa timid xilli maamulka Trump uu xiriir la lahaa dawladda kumeel gaarka ah ee Venezuela tan iyo markii ciidamada Maraykanku ay gacanta ku dhigeen madaxweynihii hore Nicolás Maduro iyo xaaskiisa 3-dii bishii Janaayo ee ka dhacday caasimadda Caracas. Labadaas qof ayaa loo qaaday magaalada New York si ay u wajahaan eedaymo la xiriira ka ganacsiga maandooriyaha, inkastoo ay labaduba iska fogeeyeen eedahaas.

Maduro ayaa wali dhanka sharciga u ah madaxweynaha dalkaas, maadaama saacado ka dib hawlgalkii Janaayo ay maxkamadda sare ee dalkaas ku dhawaaqday in maqnaanshihiisu uu yahay mid "kumeel gaar ah," taas oo meesha ka saartay baahida doorasho degdeg ah, isla markaana ilaalisay xasaanadda uu xafiisku siinayo marka loo eego xeerarka caalamiga ah.

Maxkamadda ayaa amartay in Rodríguez ay xafiiska hayso muddo 90 maalmood ah, iyadoo suurtagal ay tahay in loo kordhiyo lix bilood haddii uu ansixiyo baarlamaanka dalkaas oo uu guddoomiye u yahay walaalkeed. Muddadii 90-ka maalmood ahayd ee hore loogu qabtay ayaa ku eg maalinta Jimcaha ah ee soo socota.

GAROWE ONLINE