Mareykanka oo codka diidmada qayaxan ku horistaagay xabbad-joojinta Qasa

Duqeymaha Israa’iil ee Qasa ayaa weli sii socda, iyadoo tobaneeyo lagu dilay koonfurta Qasa.

DOOXA, Qadar - Mareykanka ayaa diidmada qayaxan ku diiday qaraarka xabad joojinta Qasa ee uu soo jeediyay xoghayaha guud ee Qaramada Midoobay António Guterres, ka dib fadhi golaha ammaanka uu uga dooday dagaalka Qasa iyo xabbad joojinta.

Falastiiniyiinta ayaa ku dhaleeceeyay Mareykanka inuu ka dhago adaygay baaqa Qaramada Midoobay ee xabad joojinta, inkastoo ay jiraan cadaadis sii kordhaya oo ku aadan sidii loo badbaadin lahaa shacabka falastiin ee ku sugan Qasa.

Duqeymaha Israa’iil ee Qasa ayaa weli sii socda, iyadoo tobaneeyo la sheegay in lagu dilay weerarrada Khan Yuunis ee koonfurta magaaladaas, hay’adda cunnada adduunka ee WFP ayaa sheegtay in Falastiiniyiinta ku barakacay dagaalka ay ku nool yihiin waddooyinka iyaga oo aan helin cunto iyo agab kale oo aasaasiga ah.

Ugu yaraan 17,487 Falastiiniyiin ah ayaa lagu dilay Qasa tan iyo 7-dii October. halka tirada rasmiga ah ee dhimashada Israa’iil ay marayso 1,147 qof.

GAROWE ONLINE