Maxaa ku soo kordhay dagaalka Suudaan?
-
GAROWE ONLINE XAFIISKA MUQDISHO
- Posted On 01-10-2023, 07:52AM
KHARTOUM - Ciidamada Suudaan iyo xoogaga Dacam Sariic ayaa isweydaarsaday duqeymo ay ku garaacayeen fariisimaha ay ku leeyihiin caasimadda Khartoum, halka madaxa golaha madaxbanaanida, Abdel Fattah al-Burhan, uu xaqiijiyay inuu soo afjari doono wax uu ku tilmaamay fallaagada hubeysan.
Wararka ayaa intaasi ku daraya in ciidamada Sudan ay duqeymo xoogan ka geysteen goobaha ay kaga sugan yihiin Dacam Sariic xaafadaha” Jabra”, “Al-Shajara”, iyo “Al-Hilla Al-Jadiidah”, oo ku yaala agagaarka xarunta taliska ciidamada.
Saxaafadda Suudaan ayaa warisay in ciidamada Sudan ay beegsanayeen xarumaha ciidamada “Dacam Sariic” ee ku yaala bartamaha iyo bariga magaalada Omdurman ee galbeedka caasimadda.
Tan iyo bartamihii bishii April ee sanadkan, ciidamada Sudan iyo xoogaga Dacam Sariic waxa ay wadeen colaad ay ku dhinteen in ka badan 5,000 oo qof, sidoo kalena ay ku barakaceen in ka badan 5 milyan oo qof, sida ay sheegtay Qaramada Midoobay.
GAROWE ONLINE
