"Naxariis-darro": Maxaabiis Falastiiniyiin ah oo dalal shisheeye loo masaafuriyay markii la sii daayay

Qoysaska maxaabiista Falastiiniyiinta ah ee la sii daayay iyada oo qayb ka ah is-weydaarsiga maxaabiista ayaa sheegay in farxadda ay sugayeen muddo dheer ay naxdin ku noqotay, kadib markii ay ogaadeen in la masaafurin doono kuwa ay jecel yihiin ee Israel sii daysay.

Xafiiska Warbaahinta Maxaabiista Falastiiniyiinta ayaa sheegay in ugu yaraan 154 maxbuus Falastiiniyiin ah oo la sii daayay Maanta, qaybna ka ah heshiiska is-weydaarsiga maxaabiista ee lala galay Xamaas, lagu khasbay in loo masaafuriyo dalal kale.

Maxaabiistan la masaafurinayo ayaa ka mid ah 250 Falastiiniyiin ah oo Israel xirtay, iyo ku dhawaad 1,700 qof oo laga qabtay Qaza mudadii labada sano ahayd ee uu socday dagaalka Israel – kuwaas oo badankood ay Qaramada Midoobay sheegtay in la waayay raadkoodii.

Dhinaceeda, Xamaas iyo kooxo kale oo Falastiiniyiin ah ayaa sii daayay 20 maxbuus Israa'iiliyiin ah, iyadoo lagu heshiiyay xabbad-joojin ku meel gaar ah oo ka dhaqan gashay Qaza.

Weli lama oga si rasmi ah dalalka maxaabiista la masaafurinayo loo gayn doono, balse kuwa badan ayaa loo diray dalal gobolka ah sida Tuuniisiya, Aljeeriya, iyo Turkiga.

Falanqeeyayaal ayaa sheegay in masaafurinta khasabka ah ay jebinayso xuquuqda maxaabiista la sii daayay, taasoo sidoo kale muujinaysa labo-wajiilenimada Israel.

GAROWE ONLINE