Omar Fateh oo Aqbalay Guuldarradiisa Doorashada Duqa Magaalada Minneapolis

Minneapolis, Minnesota – Omar Fateh, oo ahaa musharaxa ugu weyn ee la tartamay duqa magaalada Minneapolis, Jacob Frey, ayaa Arbacadii aqbalay guuldarradiisa kadib doorashadii duqa magaalada, isaga oo sheegay in ololihiisu uu kiciyay dood ballaaran oo ku saabsan sicir-bararka nolosha iyo xuquuqda shaqaalaha.

Jacob Frey ayaa ku guuleystay xilkiisa saddexaad kadib markii uu helay taageero ku filan wareegga labaad ee codbixinta, taas oo lagu saleeyo nidaamka kala-doorashada darajooyinka (ranked-choice voting) ee magaalada. Doorashadan ayaa ahayd tii ugu codbixinta badnayd taariikhda magaalada.

Haddii uu guuleysan lahaa, Omar Fateh wuxuu noqon lahaa duqii ugu horreeyay ee Muslim ah, Soomaali Maraykan ah, iyo xisbiga dimuqraadiga bulshac-dhexe (democratic socialist) ah ee Minneapolis – magaalo lagu tilmaamo inay leedahay bulshada Soomaalida ugu weyn dalka Maraykanka.

Omar Fateh ayaa sheegay in inkastoo uu luminayo kursiga duqa magaalada, haddana ololihiisu uu horseeday wadahadallo muhiim ah oo la xiriira “qiimaha nolosha, sinnaanta, iyo xuquuqda dadka shaqeeya.”

Wuxuu yiri: “Mahadsanidiin, Minneapolis! Inkastoo natiijadani aysan ahayn tii aan rajaynaynay, haddana waxaan si aad ah ugu mahadcelinayaa qof kasta oo taageeray ololahayaga ku dhisnaa dadweynaha. Waan sii wadi doonaa halganka aan kula jiro si aan u dhisno magaalada aan mudannahay. Hore u soco!”

GAROWE ONLINE