Pakistan oo ku hanjabtay inay duqeynayso Xuutiyiinta haddii ay sii wadaan weerarrada Sacuudiga

ISLAMABAD — Wasiirka Difaaca Pakistan Khawaja Asif ayaa sheegay in weerarrada Xuutiyiinta ee ka dhanka ah Sacuudiga ay horseedi karaan in la dhaqan geliyo Heshiiska Difaaca Wadajirka ah ee Maka, oo ay kala saxiixdeen Pakistan, Sacuudiga iyo Türkiye.

Asif ayaa sheegay in heshiisku si cad u dhigayo in weerar hubeysan oo lagu qaado mid ka mid ah saddexda dal loo arko weerar lagu qaaday dhammaantood. Wuxuu sheegay in haddii colaadda Yemen ay ku fido gudaha Sacuudiga, heshiisku uu noqon karo mid si rasmi ah loo dhaqan geliyo. 

“Ma jirto wax mugdi ah. Haddii gardarro aan loo meel dayin ama dagaalka Yemen uu ku fido Sacuudiga, heshiisku hubaal wuu dhaqan geli doonaa,” ayuu yiri Asif, isagoo sheegay in Pakistan ay u hoggaansami doonto shuruudaha heshiiska haddii loo baahdo.

Hadallada wasiirka ayaa yimid kadib markii Xuutiyiintu 8-dii Sebtembar weerarro waaweyn oo gantaallo iyo diyaaradaha aan duuliyaha lahayn ah ku qaadeen koonfurta Sacuudiga. Weerarrada ayaa lagu bartilmaameedsaday xarumo tamareed iyo militari oo ku yaalla Abha, Jizan, Najran iyo Khamis Mushait, waxaana lagu dhaawacay ugu yaraan 73 qof. 

Warbixin ay soo saartay Türkiye Today ayaa sidoo kale sheegtay in ilo Pakistani ah ay sheegeen in Islamabad ay tixgelinayso inay duqeymo cirka ah ka fuliso fariisimaha Xuutiyiinta ee Saada iyo deegaanno kale oo Yemen ah, haddii Riyadh si rasmi ah u codsato. Si kastaba, ilahaasi waxay sheegeen in aan weli go’aan kama dambeys ah laga gaarin weerarradaas.

Haddii Pakistan ay tallaabo militari ka qaaddo Yemen, waxay noqon lahayd isbeddel weyn oo ku yimaada xaaladda gobolka, iyadoo Islamabad ay si toos ah ugu lug yeelan lahayd dagaalka u dhexeeya Xuutiyiinta iyo Sacuudiga.

Xiisadda ayaa sidoo kale sii kordhisay walaaca laga qabo in dagaalka Yemen uu mar kale isu beddelo dagaal ballaaran. Weerarradii Xuutiyiinta ee dhowaan ka dhacay Sacuudiga ayaa sababay dab ka kacay xarumo tamareed, waxaana sidoo kale saameyn ku yimid hawlgallada qaar ka mid ah xarumaha shidaalka.

Heshiiska Maka waxaa saxiixay Pakistan, Sacuudiga iyo Türkiye 7-dii Agoosto 2026, iyadoo ujeeddadiisu tahay in saddexda dal ay si wadajir ah uga jawaabaan gardarro ka dhan ah mid ka mid ah xubnaha.

GAROWE ONLINE