Pete Hegseth oo Sheegay in Maraykanka uu Sii Wadi Doono Go’doominta Dekedaha Iran 

WASHINGTON - Xoghayaha Difaaca Maraykanka, Pete Hegseth, ayaa ku dhawaaqay in go’doominta milatari ee lagu hayo dekedaha Iran ay sii socon doonto "inta ay qaadato," isagoo xaqiijiyay in Washington ay diyaar u tahay inay weerarto xarumaha tamarta iyo kaabayaasha muhiimka ah ee Iran.

Hegseth ayaa hadalkan jeediyay Khamiistii xilli uu socdo hakad kooban oo xagga dagaalka ah oo la isku raacay toddobaadkii hore. Arrintan ayaa daba socota go’aankii Madaxweyne Donald Trump uu Isniintii ku dhawaaqay in la go’doomiyo dekedaha Iran ee ku yaalla Marinka Hormuz iyo Gacanka, ka dib markii ay guuldarraysteen wadahadalladii u dhexeeyay labada dal ee ka socday dalka Pakistan.

Xoghayaha Difaaca ayaa adeegsaday hadallo kulul, isagoo sheegay in Maraykanku uu hadda ka xoog badan yahay sidii hore, isla markaana uu hayo sirdoon aad u tayo sarreeya oo u oggolaanaya inay la socdaan dhaqdhaqaaq kasta oo Iran ay samayso muddada lagu jiro hakadka dagaalka, kaas oo la filayo inuu socdo illaa horraanta toddobaadka soo socda.

Hegseth wuxuu caddeeyay in haddii Iran ay doorato waddo khaldan, ay la kulmi doonaan duqaymo lala beegsado warshadaha korontada iyo tamarta, balse wuxuu xusay in Maraykanku uu doorbidayo in khilaafka lagu xalliyo diblomaasiyad si dadka Iran ay u helaan mustaqbal barwaaqo ah.

Iskahorimaadkan ayaa markii hore billowday 28-kii Febraayo, ka dib weeraro ay Maraykanka iyo Israa’iil ku qaadeen gudaha Iran.

GAROWE ONLINE