Putin oo jeediyey khudbadii ugu adkeyd kana dhan ah Mareykanka

Madaxweynaha Ruushka ayaa khudbadan ka jeediyey xaflada uu ku shaaciyey qabsashada gobolada Ukraine.

MOSCOW, Russia - Madaxweynaha Ruushka Vladimir Putin ayaa kaga dhawaaqay in ay la wareegeen afar gobol oo qayb ahaan laga qabsaday Ukraine xaflad lagu saxiixayay oo ka dhacday Kremlin.

Ukrain, wadamada reer galbeedka iyo xoghayaha guud ee Qaramada Midoobay ayaa dhaleeceeyay tallaabadaas, taasoo ka dhigan inuu sii kordhayo dagaalka ka billowday duulaanka Ruushka ee 24-kii Febraayo.

Putin wuxuu sheegay in Ruushku helay "afar gobol oo cusub", isagoo ugu yeeray dadka deggan Ukraine ee Donetsk, Luhansk, Kherson iyo Zaporizhia "in ay muwaadiniin ahaan doonan weligood".

"Tani waa rabitaanka malaayiin dad ah," ayuu ku yiri khudbadii uu ka hor jeediyay boqolaal marti sharaf ah oo ka dhacay hoolka St George's ee Kremlin.

"Waxaan ku difaaci doonaa dhulkeena si walba oo aan awoodno iyo wax walba oo aan awoodno," ayuu raaciyay, isaga oo ugu yeeray "maamulka Kyiv inuu si degdeg ah u joojiyo colaadda oo aan ku soo laabto miiska wadahadalka".

Mid ka mid ah khudbadiisii ​​ugu adkeyd ee ka dhanka ah Mareykanka muddo ka badan 20 sano oo uu xukunka hayay, Putin wuxuu ka dhawaajiyay inuu diyaar u yahay inuu sii wado waxa uu ugu yeeray dagaalka “Ruushka taariikhiga ah ee weyn".

Reer galbeedka ayuu ku qeexay "gumeysi cusub oo doonaya inuu burburiyo dalkeena".

Cadaymo la'aan ayuu ku eedeeyeen Washington iyo xulafadeeda inay qarxiyeen dhuumaha gaaska ee Nord Stream kuwaasoo shidaal kasoo qaada Ruushka islamarkaana keena dalka Jarmalka una sii gudba Yurub.

GAROWE ONLINE