Ruushka iyo Shiinaha oo bilaabay dhoolatus milatari wadajir ah

Moscow iyo Beijing ayaa waxay diiradda saarayaan "kor u qaadista" heerka kalsoonida labada dhinac.

MOSCOW, Russia - Ciidamada badda ee Shiinaha iyo Ruushka ayaa Arbacada maanta ah bilaabay dhoolatuskooda milatari ee wadajirka ah ee badda bari ee waddanka Shiinaha.

Moscow iyo Beijing ayaa waxay diiradda saarayaan "kor u qaadista" heerka kalsoonida labada dhinac iyo kor u qaadida samaynta habka wadajirka ah ee ilaalinta badda.

Dhoolatuskan ayaa qeyb ka ah iskaashiga sanadlaha ah ee u dhaxeeya ciidamada Shiinaha iyo Ruushka, sida ay sheegtay majalad ku soo baxda afka militariga Shiinaha.

Maraakiibta Shiinaha ayaa Salaasadii shalay ka shiraacday deked milatari oo ku taal Zhoushan ee bariga gobolka Zhejiang halka maraakiibta badda ee Ruushka ay Sabtidii hore ka ambabaxeen magaalada Vladivostok si ay dhoolatus milateri u sameeyaan.

"Waxay muujin doontaa go'aanka iyo awoodda labada dhinac inay si wadajir ah uga jawaabaan khataraha amniga badda iyo ilaalinta nabadda iyo xasilloonida caalamiga ah iyo gobolka," ayay tiri majaladda.

Maraakiibta Gantaalka ee Ciidanka Badda Ruushka Varyag, Marshal Shaposhnikov, Corvettes Aldar Tsydenzhapov iyo Sovershenny, iyo markabka saadka ee Pechanga ayaa ka qayb qaadanaya dhoolatuska.

Isniintii, xukuumadda Moscow ayaa waxay carabka ku adkeysay "ujeedka ugu weyn" ee dhoolatuska wadajirka ah ee badda uu yahay "waa in la xoojiyo iskaashiga badda" ee labada dal.

GAROWE ONLINE