Ruushka oo guluf maskaxeed kula shirtagay duulaanka Ukraine

Tayyib Erdogan ayaa ugu baaqay Ukraine iyo Ruushka inay si deg deg ah u joojiyaan dagaalka.

MOSCOW, Russia - Xilli Ruushku uu ku cagajuglaynayo in uu gantaallo la dhici doono caasimadda Kyiv, wasiirka difaaca ee Ukraine, Oleksiy Reznikov, ayaa ka digay suurtagalnimada "weerar maskaxeed" oo waddanka Ruushku sameeyo.

Isaga oo adeegsanaya ciwaankiisa gaarka ah ee mareegga Facebook-ga, waxa uu ku andacoodey in Ruushku uu markii ugu horeysay qorsheynayey inuu carqaladeeyo isgaarsiinta.

"Intaa ka dib, waxaa jiri doona qaybin ballaaran oo warar been abuur ah oo ku saabsan hoggaanka siyaasadda iyo millatariga Yukreeniyaan ee la sheegay in lagu heshiiyey in wax laga qabto," ayuu qoray.

Wuxuu intaas ku daray hadalkiisa: "Si loo caddeeyo wararka been abuurka ah, waxay daabici doonaan sawirro dukumeenti saxiix ah iyo muuqaal been abuur ah, hadaba waa been".

Dhanka kale, weerar ay ciidamada Ruushka ku qaadeen taawar telefishin oo ku yaal magaalada Kyiv ayaa waxaa ku dhintay shan qof, shan kalena waa ay ku dhaawacmeen, sida ay bayaan ku sheegeen ciidamada gurmadka ee Ukraine.

Andrew Simmons oo ka tirsan Al Jazeera uga soo warramaya Lviv, ayaa sheegay in weerarka uu ka horreeyay digniin ay soo saartay wasaaradda gaashaandhigga Ruushka laba saacadood ka hor.

Wasaaraddu waxay uga digtay dadka deggan Kyiv ee ku nool meelaha u dhow xarumaha laga yaabo in loo isticmaalo ujeeddooyin sirdoon oo milatari ah inay ka guuraan.

Fahfaahintan, si kastaba ha ahaatee, waxa ay quseysaa tiro aad u badan oo ah goobaha dowliga balse madaniga ah. "Tani waxay khusaysaa saldhigyada booliiska, xataa," Simmons ayaa yidhi.

Madaxweynaha Turkiga, Tayyib Erdogan, ayaa ugu baaqay Ukraine iyo Ruushka inay si deg deg ah u joojiyaan dagaalka ayna "ka qayb qaataan nabadda adduunka", isagoo intaa ku daray in Ankara aysan kasoo horjeedin ballaarinta NATO. Turkiga oo xubin ka ah NATO, ayaa xuduud badeed la wadaaga Ukraine iyo Ruushka, waxaana uu xiriir wanaagsan la leeyahay labadaba.

Isniintii todobaadkan, Ankara ayaa sheegtay in ay xidhayso marinkeeda badda madow intii uu Ruushka waddo gulufka Ukraine, taas oo xaddidaysa marinka qaar ka mid ah maraakiibta Ruushka ee ka soo gudbaya badda Mediterranean-ka.

GAROWE ONLINE