Ruushka oo si carro leh uga jawaabay dil loogu hanjabay Vladimir Putin

Moscow ayaa waxay dalbatay in cunaqatabeyn lagu soo rogay mas'uuliyiinta dalkan.

MOSCOW, Russia - Wasiirka arrimaha dibadda ee Ruushka, Sergey Lavrov, ayaa sheegay in uu rajaynayo in reer galbeedku ay cunaqabatayn ku soo rogaan mas’uuliyiinta Ukraine ka gadaal markii ay u hanjabeen madaxweyne Vladimir Putin.

Vadim Skibitsky, oo ah ku xigeenka madaxa agaasinka sirdoonka ee Ukraine, ayaa u sheegay wargeyska German Welt, in Putin uu "ku jiro liiska dadka ay Ukraine dooneyso in ay khaarijiso".

Lavrov oo ka jawaabay hadalkaas isla markaana adeegsadey luuqad aad u adag ayaa wuxuu sheegay in lasoo gaarey waqtigii Kiev loo aqoonsan lahaa in ay tahay "dal argagixiso". "

"Waxaan rajeynayaa in cunaqabateynta ka dhanka ah 'mas'uuliyiintan ugu sarreeya' ay raaci doonaan," ayuu yiri wasiirka arrimaha dibadda ee Ruushka oo wareysi siiyay TV-ga Ruushka ee Rossiya 24.

Lavrov waxa uu intaa ku daray in uu rumaysan yahay in "mashruucyada fadhiya Washington iyo London ay bilaabeen in ay la yaaban yihiin sida ay dadkani [masuuliyiinta sare ee Ukraine] ugu filan yihiin".

8-dii Maajo, Kyrylo Budanov, oo ah madaxa Agaasinka Sirdoonka ee Ukraine, ayaa ka hadlay dilka weriyaha Ruushka u dhashay ee Darya Dugina wuxuuna yiri: "Waan dilnay, dilnay, waana ku dilaynaa Raashiyaanka meel kasta oo adduunka ah".

Dugina ayaa ahaa saxafi ka faallooda arrimaha milatariga kaasoo si weyn uga soo dhex-muuqday dagaalka Ukraine iyo Ruushka ee galaaftey nolosha boqolaalka qof ee u badan askar ka kala tirsan labada dal ee colaada soo jireenka ah dhextaalo.

GAROWE ONLINE