Shacabka Niger oo ka soo horjeestay Safiirka Faransiiska

NIAMEY, Niger - Waxaa shalay dhamaaday waqtigii ay madaxdii afgambiga dalka Niger u qabteen safiirka Faransiiska, Sylvain Ait, in uu dalka kaga baxo, xilli agagaarka saldhigga ciidammada Faransiiska ee caasimadda Niamey uu ka dhacay bannaanbax looga soo horjeeedo joogitaanka safiirka Paris ee dalka.

Dadka isugu soo baxay ayaa kor u qaaday calamada dalalka Niger iyo Ruushka, waxaana ay ku dhawaaqayeen erayo ay ku cambaareynayaan mawqifyada Faransiiska oo ay ku eedeeyeen in ay wax u dhimeyso ammaanka dalkaasi.

Halka qaar kalena ay wateen boorar ay ku dalbanayaan in ciidamada Faransiiska ay ka baxaan dalka, maadaama 1,500 oo askari oo Faransiis ah ay weli ku sugan yihiin dalka Niger.

Warbaahinada caalamka ayaa wariyay in safiirka Faransiiska u fadhiya Niamey uu weli ku sugan yahay dalka Niger, inkastoo madaxda afgambiga ay ka codsadeen inuu dalka ka baxo.

Saacado ka hor inta uusan dhamaanin waqtiga kama dambeysta ah ee golaha militariga ee Niger u qabtay Safiirka, xubin ka tirsan golaha oo lagu magacaabo Colonel Bashir Amadou ayaa sheegay in shacbka Niger ay ku qasbi doonaan safiirkan inuu dalka ka tago.

Colonel Bashir ayaa sidoo kale ku baaqay in la sii wado "abaabulka iyo halganka" ilaa iyo inta dalka laga musaafirnayo askarigii ugu dambeeyay ee Faransiis ah.

GAROWE ONLINE