Shirkadda Twitter-ka oo loo haysto kirada xarunteeda dhexe

Fadeexadan ayaa soo ifbaxdey tan iyo intii uu sanadkii hore la wareegay bilyan-dheerka Elon Musk.

MUQDISHO, Soomaaliya - Waxaa isa soo taraya fadeexadaha iyo dhibaatooyinka haysta shirkadda Twitter-ka tan iyo intii uu sanadkii hore la wareegay bilyan-dheerka Elon Musk.

Sida ay sheegayaan warbaahinta caalamka, arrintii ugu dambeysay ee soo baxday ayaa waxay tahay in xitaa loo haysto kiradda xarunteeda dhexe ee shaqada ugu badan ka socoto.

Maxkamad ku taala magaalada San Francisco ee gobolka California ayaa laga diiwaangaliyay gal dacwadeed ay furatay shirkadda Siri Nine oo leh dhismaha xarunta u ah Twitter. Waxa dacwadani ay quseysaa wax ka badan $3 milyan doolar oo kiro ah oo ay shirkadda bixin weysay bilihii lasoo dhaafay.

Shirkad kale oo ku taala London ayaa iyaduna gal dacwadeed ka furatay maxkamad kadib markii xafiisyada Twitter ee London, UK la bixin waayay kiradooda.

Bishii lasoo dhaafay, shir kale oo ayaa iyaduna dacwad kirada la xiriirta ka furatay California oo Twitter xafiis kale ku leedahay. Tani waxay qabsatay warbaahinta caalamka.

Arrintan ayaa kusoo aadaysa xilli mulkiile Elon Musk uu qiraal ka dhiibanayo maxkamad kale oo ay soo saareen koox maalgashadayaal ah oo ku haysta qoraal uu Twitter soo dhigay oo ay sheegeen in uu ku marin habaabiyay go’aanadooda.

Mr Musk ayaa qaaday tallaabooyin uu ku dhimayo qarashka ku baxa shirkadda, isaga oo dhimay kala bar shaqaalihii, kalana direy maamulkii sare ee shirkadda.

Sikastaba, ma cadda halka ay ku dambeyn doonto shirkadda Twitter-ka, balse waxaa maalinba maalinta kasii dambeysa soo siyaadaya dacwadaha iyo dhibaatooyinka kale ee soo wajahaya.

GAROWE ONLINE