Suurtagal ma tahay in Putin lagu xiro dalka Brazil?
-
GAROWE ONLINE XAFIISKA MUQDISHO
- Posted On 10-09-2023, 05:20AM
NEW DELHI, Hindiya - Madaxweynaha Brazil Luiz Inacio Lula da Silva ayaa Sabtidii sheegay in dhigiisa Ruushka Vladimir Putin aan la xiri doonin hadii uu ka qeyb galo shirka G20, ee sanadka soo socda lagu wado inuu ka dhaco Brazil
Isagoo ka hadlayay kulanka G-20 ee New Delhi, ayuu Lula sheegay in Putin lagu casuumi doono inuu ka soo qeyb galo shir madaxeedka sanadka soo socda.
Wuxuu intaas ku daray in isaga laftiisa uu qorsheynayo inuu ka qeyb galo shirka BRICS ee dalalka soo koraya, kaasoo lagu wado in lagu qabto Ruushka ka hor kulanka Rio.
"Waxay ila tahay in Putin uu si fudud ku aadi karo Brazil, suurtagal ma ahan in lagu xiro intaan madaxweyne ka ahay" ayuu yiri Lula
Maxkamadda caalamiga ah ee dambiyada ayaa hore usoo saartay amar lagu soo xirayo Putin bishii Maarso, iyadoo ku eedeysay inuu galay dambi dagaal kadib markii uu si sharci darro ah uga musaafuriyay Ukraine boqolaal carruur ah.
Halka Ruushka ay beeniyeen in ciidamadooda ay ku lug leeyihiin dambiyo dagaal ama ay si qasab ah ku kaxeysteen caruur u dhalatay Ukraine.
GAROWE ONLINE
