Taliban oo gashay Kabul kuna dhawaaqdey amaro cusub

Hogaamiyaha Afghanistan ayaan la maqal tan iyo markii shalay uu soo duubay muuqaal. [Photo: AP]

KABUL, Afghanistan - Daalibaan ayaa billawday inay dhinac walba ka soo galaan caasimadda Afghanistan ee Kabul, sida ay Axada maanta ah shaaca ka dhigtay wasaaradda arrimaha gudaha Afghanistan.

Hoggaamiye ka tirsan Taalibaan kuna sugan Doha ayaa sheegay in kooxdu ku amartay dagaalyahannadeeda inay ka waantoobaan rabshadaha, una oggolaadaan marin ammaan ah qof kasta oo doonaya inuu baxo si gaar ahna loo ilaaliyo haweenka.

Sarkaal ka tirsan Afgaanistaan ​ ayaa sheegay in mintidiintu ay qabsadeen caasimadda gobolka ee Khost. Xubin ka tirsan golaha gobolka oo ka gaabsaday magaciisa ayaa wakaaladda wararka ee AP u xaqiijiyay qabashada.

"Dawladda dhexe ee Afgaanistaan waxay sii luminaysaa ​​inay gacanta ku hayso Kabul iyaddoo horey u wayday shan caasimadood oo gobol oo ka mid ah 34 -da waddan," ayuu yiri sarkaalka.

Agaasimaha guud ee xafiiska Madaxweyne Ashraf Ghani ayaa bartiisa Twitter-ka ugu booriyay dadka reer Kabul. "Fadlan ha welwelin. Dhib ma jiro. Xaaladda Kabul ayaa gacanta lagu hayaa".

Qoraalkan ayaa imaanaya iyadoo Taliban ay dhinac walba ka soo gashay caasimadda Afgaanistaan ​​waxaana la sheegay inay ka sameeyeen guulo waaweyn dhowr kiilomitirna u jiraan magaalada weyn.

Madaxweyne Ghani laftiisa, lama maqal tan iyo markii uu khudbad gaaban jeediyey Sabtidii shalay, taasoo qudheeda ahayd mid lasoo duubay loona qeybiyey warbaahinta gudaha iyo kuwa caalamiga ah.

Guusha ay Axada maanta ah gaartey Taliban ayaa timid saacado kadib markii kooxdu la wareegtay magaalada muhiimka ah ee bariga Jalalabad oo ku suntey jidka muhiimka ah ee isku xira Afghanistan iyo Pakistan.

GAROWE ONLINE