Tirada caruurta ku dhimatay dagaalka Ukraine oo lasoo bandhigay
-
WARIYAHA CAALAMKA GAROWE ONLINE
- Posted On 04-04-2023, 04:57AM
MOSCOW, Russia - In ka badan 500 oo caruur ah ayaa lagu waramay in lagu dilay gudaha dalka Ukraine tan iyo markii Ruushka uu bilaabay duulaanka ka dhanka ah waddankan dariska la ah.
Agaasimaha fulinta ee hay’adda Qaramada Midoobay u qaabilsan daryeelka carruurta ee UNICEF, Catherine Russell, ayaa sheegtey in qaar kale oo intaas ka badan ay ku dhaawacmeen dagaalka.
“Waa dhacdo kale oo naxdin leh oo ku dhacday carruurta iyo qoysaska Ukraine. Tan iyo markii uu dagaalka sii xoogeystay bishii Febraayo 2022, ugu yaraan 501 carruur ah ayaa la dilay,” ayay ku tiri Twitter-ka.
Catherine Russell oo hadalkeeda sii wadata ayaa waxay hoosta k xariiqdey in tirada dhabta ah "ay u badan tahay in ay aad uga badan tahay" tirooyinka ay xaqiijisay UNICEF.
Russell ayaa tibaaxdey in ku dhawaad 1,000 carruur ah ay dhaawacmeen, kuwaas oo ka tagay nabarro iyo xanuuno maskaxeed -- kuwa muuqda iyo kuwa aan la arki karinba -- kuwaas oo nolosha sii jiri kara.
"Tiro kasta waxaa ka danbeysa qoys kala go'ay oo weligiis is beddelay. Waa qalbi-jab," ayay tidhi. "Ugu dambeyntii, carruurta iyo qoysasku waxay u baahan yihiin nabad. Degdeg uma iman karto".
GAROWE ONLINE
