Trump oo Netanyahu uga digay joogitaanka ciidamada Israel ee Suuriya iyo Lubnaan

WASHINGTON - Madaxweynaha Mareykanka Donald Trump ayaa Ra’iisul Wasaaraha Israel Benjamin Netanyahu ku boorriyay in ciidamada Israel ay bilaabaan inay ka baxaan qaybo ka mid ah Suuriya iyo Lubnaan, sida ay werisay Axios oo soo xiganeysa saraakiil Mareykan iyo Israa’iili ah.

Warbixinta ayaa sheegtay in intii lagu jiray wada hadal telefoon oo dhex maray labada hoggaamiye Khamiistii la soo dhaafay, Trump uu Netanyahu uga digay khatarta sii kordheysa ee isku dhacyo ka dhalan kara joogitaanka Ciidanka Difaaca Israel (IDF), gaar ahaan koonfur-bari Suuriya.

"Ma rabaan inaad halkaas joogtaan. Waa inaad dib u daabushaan ciidamada," ayuu Trump la sheegay inuu u sheegay Netanyahu, sida ay qortay Axios.

Netanyahu ayaa la sheegay inuu ka horyimid taladaas, isaga oo ku dooday in Israel ay u baahan tahay inay sii haysato aagag amni oo ku yaalla Suuriya iyo Lubnaan si loo ilaaliyo ammaanka dalka.

Wararkan ayaa imanaya iyadoo diblomaasiyiin ka kala socday Israel iyo Lubnaan ay maanta ku kulmeen magaalada Rome si ay uga wada hadlaan iskaashiga ku saabsan qorshaha bixitaanka tartiib-tartiibka ah ee ciidamada Israel ee koonfurta Lubnaan.

Dhanka kale, Wasiirka Arrimaha Dibadda Israel, Gideon Sa’ar, ayaa intii uu booqasho ku joogay Jamhuuriyadda Czech sheegay in Ciidanka Difaaca Israel ay isku diyaarinayaan inay ka baxaan laba aag oo tijaabo ah oo ku yaalla koonfurta Lubnaan.

GAROWE ONLINE