Trump oo Soomaaliya ku daray liiska dalal uu ka joojiyay Codsiyada Socdaalka Mareykanka

WASHINGTON, 03 Diseembar 2025 — Dowladda Mareykanka ayaa shaacisay in si ku-meel-gaar ah loo joojiyay codsiyada socdaalka ee ka imanaya 19 dal, oo ay Soomaaliya ku jirto. Go’aankan ayaa yimid todobaad kaddib markii labo askari oo ka tirsan National Guard lagu dilay magaalada Washington, taasoo kor u qaaday walaaca ammaanka gudaha.

Hay’adda Socdaalka iyo Jinsiyadda Mareykanka (USCIS) ayaa horey u hakisay habraacyada magangelyo-doonka Jimcihii lasoo dhaafay. Madaxa hay’adda, Joseph Edlow, ayaa sheegay in tallaabadan looga gol leeyahay in si adag loo hubiyo dadka ajnabiga ah ee codsiyada u soo gudbiya, si loo xaqiijiyo ammaanka dalka.

Dalalka ay saameysay hakinta waxaa ka mid ah Venezuela, Cuba, Haiti, Sierra Leone, Togo, Equatorial Guinea, Chad, Republic of Congo, Sudan, Soomaaliya, Libya, Burundi, Yemen, Iran, Turkmenistan, Afghanistan, Myanmar, iyo Laos. Qaar ka mid ah dalalkan ayaa horey uga jiray liiska xayiraadaha socdaalka ee madaxweynihii hore Donald Trump.

Talaabadan ayaa sidoo kale ku soo beegmaysa xilli Madaxweyne Trump uu mar kale sare u qaaday hadalladiisa ka dhanka ah muhaajiriinta Soomaaliyeed ee Minnesota, isagoo sheegay in uusan rabin muhaajiriin ka imaanaya Bariga Afrika.

Saraakiisha socdaalka ayaa lagu soo waramayaa inay qorsheynayaan howlgallo lagu baadho dadka sharci-darrada ah, gaar ahaan magaalooyinka Minneapolis iyo St. Paul, taasoo abuurtay walaac ballaaran oo ka dhex jira bulshooyinka muhaajiriinta.

GAROWE ONLINE