Trump: "Shiinuhu wuxuu ii ballanqaaday inaysan hub siin doonin Iran"
-
GAROWE ONLINE
- Posted On 15-04-2026, 01:53PM
WASHINGTON - Madaxweynaha dalka Mareykanka Donald Trump ayaa shaaca ka qaaday inuu madaxweynaha Shiinaha Xi Jinping ka codsaday inuusan hub ka iibin dalka Iran.
Trump oo wareysi siiyay telefishinka Fox Business ayaa sheegay inuu markii hore maqlay warar sheegaya in Shiinuhu uu hub siinayo Tehran, taasina ay ku khasabtay inuu xiriir toos ah la sameeyo dhiggiisa Shiinaha.
Trump ayaa tilmaamay inuu warqad rasmi ah u qoray Madaxweyne Xi Jinping, isagoo si gaar ah uga codsaday inuu ka fogaado tallaabo kasta oo hub loogu dhoweynayo Iran.
Sida uu sheegay madaxweyne Trump, Xi ayaa qoraal jawaab ah ugu xaqiijiyay in dowladdiisu aysan wax hub ah siinaynin dalka Iran, inkasta oo warbaahinta Mareykanka ay horay u baahiyeen xog ka timid sirdoonka oo muujinaysay in Beijing ay isu diyaarinayso rarkii ugu horreeyay ee hub casri ah oo loo diro dalka Iran.
Dhaqdhaqaaqan dublamaasiyadeed ayaa ku soo beegmaya xilli uu jiro shaki xooggan oo ku aaddan iskaashiga milateri ee u dhexeeya Shiinaha iyo Iran, iyadoo dowladda Mareykankuna ay isha ku hayso dhaqdhaqaaqyada hubka ee gobolka Bariga Dhexe.
Trump ayaa booqan doono China 14ka iyo 15ka May, wuxuuna la kulmi doonaa Madaxweyne Xi Jinping oo arrimaha ganacsiga, xiririka diblomaasi iyo wadashaqeynta kawada hadli doonaan.
GAROWE ONLINE
