Turkiga: Olole loo bixiyey "Hal Qalbi" oo lagu uruuriyay $6.1 milyan
-
WARIYAHA CAALAMKA GAROWE ONLINE
- Posted On 16-02-2023, 03:27PM
ANKARA, Turkey - Tirada dhimashada dhul-gariirkii dhawaan ka dhacay gobalada koonfurta Turkiga iyo waqooyiga Suuriya ayaa korortay iyada oo ay gaartay in ka badan 41 kun oo qof.
Olole loogu magac daray "Hal qalbi" ayaa laga bilaabay idaacadaha iyo Tv-yada dalalka Turkiga, Azerbaijan iyo Qubrusta Turkiga ah.
Barnaamijkaan oo ka baxay 213 Tv iyo 562 idaacadood ayaa lagu aruuriyay dhaqaale gaaraya 6.1 milyan oo dollar waxaana la filayaa in loo adeegsado taageerida dadkii uu dhul-gariirku saameeyay.
Dhawaan ayay ahayd markii madaxweynaha Turkiga Racep Erdogan uu shaaciyey in dhamaan guryihii iyo xarumihii ku dumay dhul-gariirka ay dib u dhisayaan isaga oo sheegay in ay dowladuna taageero la garab istaagayso.
Dalka Suuriya oo isagana gobalada koonfurta ay dad badan kaga dhinteen dhul-gariirka ayaan wali gargaarku si fiican isula lug helin waxaana ugu wacan colaada halkaasoo ka ooggan.
GAROWE ONLINE
