Ugu yaraan 39 qof oo ku dhintay shil tareen oo ka dhacay koonfurta Spain

MADRID — Ugu yaraan 39 qof ayaa ku dhintay, tiro kale oo badan ayaana ku dhaawacantay shil tareen oo ka dhacay koonfurta Spain, kaasoo ah shilka ugu xun ee tareenada dalka ka dhaca in ka badan toban sano, sida ay sheegtay Ciidanka Ilaalada Rayidka ee Spain.

Tareen u socday Madrid ayaa ka baxay jidkiisii, isla markaana galay waddooyinka ka soo horjeeda, isagoo ku dhacay tareen kale oo ka soo socday jihada kale ee Adamuz habeenimadii Axadda.

Shabakadaha tareenada ayaa sheegay in 400 oo rakaab iyo shaqaale ah ay saarnaayeen labada tareen. Adeegyada degdega ah ayaa daweeyay 122 qof, halka 48 qof, oo ay ku jiraan shan carruur ah, ay wali ku jiraan isbitaalka. Waxa ka mid ah 11 qof oo waaweyn iyo hal caruur ah oo ku jira qaybta daryeelka degdega ah.

Wasiirka Gaadiidka Spain, Óscar Puente, ayaa sheegay in tirada dhimashada “aan wali dhammaystirnayn”, iyada oo baaritaan rasmi ah la bilaabay. Sababta rasmiga ah ee shilka wali lama oga, waxaana la filayaa in natiijada baaritaanku ay qaadato ugu yaraan bil, sida uu sheegay wasiirku.

Ra’iisul Wasaaraha Spain, Pedro Sánchez, ayaa sheegay in dalka uu wajihi doono “habeen xanuun weyn leh”.

Duqa magaalada Adamuz, Rafael Moreno, ayaa ka mid ahaa dadka ugu horreeyay goobta shilka, isagoo ku tilmaamay “riyo xun oo argagax leh”.

GAROWE ONLINE