Wasiirka arrimaha dibadda Maraykanka oo ku wajahan Israa’iil

WASHINGTON - Afhayeen u hadlay wasaaradda arrimaha dibadda Mareykanka Matthew Miller ayaa sheegay in xoghaye Anthony Blinken uu u safri doono Israa’iil Arbacada si uu ula kulmo madaxdeeda sare, ka dib weerar aan horay loo arag oo ay ku qaadeen ururka Xamaas.

Miller ayaa ku yiri shir jaraa'id: "Wuxuu doonayaa inuu ka maqlo hoggaamiyeyaasha Israa'iil, inuu si toos ah uga dhagaysto xaaladda ay wajahayaan, waxa ay u baahan yihiin iyo sida ugu wanaagsan ee aan u taageeri karno.”

Miller waxa uu intaa ku daray in Blinken uu iman doono Israel Khamiista, ka dibna uu aadi doono Urdun si uu ula kulmo madaxda dalkaas.

Xamaas ayaa Sabtidii weerar lama filaan ah ku qaaday Israa’iil, halkaas oo ay ku dishay 1,200 oo Israa’iiliyiin ah, tobanaan kalena ay qafaasheen.

GAROWE ONLINE