Weerar Xooggan: Qalab Isgaarsiinta ay Hezbollah Isticmaashay oo Qarxay, Khasaare Badan oo Ka Dhashay

LUBNAAN- Warar ka imanaya Lubnaan ayaa sheegaya in boqolaal dagaalyahanno ka tirsan kooxda Hezbollah ay ku dhaawacmeen weerar argagax leh kadib markii isgaarsiintooda gacanta, ee loo yaqaan “pagers,” ay si isku mid ah ugu qarxeen meelo kala duwan oo dalkaasi ka tirsan. Ugu yaraan 3,000 oo qof ayaa ku dhaawacmay, halka 8 qofna ay ku dhinteen qaraxyadan.

Sida la soo wariyey, weerarkan ayaa ka dhashay kadib markii sirdoonka Israa’iil ay farriin u direen pagers-ka, taasoo sababtay in batteriga aaladahaasi uu gaabiyo, taasoo keentay inay qarxaan. Qaraxyadan ayaa noqday mid ka mid ah weerarradii ugu yaabka badnaa ee la arko xilligan casriga ah ee dagaalka.

Dhinaca kale, wararka ayaa sidoo kale tilmaamaya suurtagalnimada in weerarkan uu yahay sababo la xiriira dhagar gudaha ah, iyadoo la sheegayo in hal cutub oo ka tirsan dagaalyahanada Hezbollah ay yihiin kuwii uu dhibku sida weyn u saameeyey. Tani waxay keentay tuhun ku saabsan in pager-yadan la sababeeyey ama lagu dhex daray waxyaabo halis ah ka hor inta aan loo qaybin dagaalyahanada subaxnimadii weerarku dhacay. Waxaa sidoo kale suuragal ah in labada sababoodba ay door ka ciyaareen weerarkan.

Warbaahinta caalamka ayaa si weyn uga hadashay weerarkan, iyadoo wakaaladda wararka ee Reuters ay sheegtay in ugu yaraan 10 dagaalyahan oo Hezbollah ah ay dhaawacmeen, halka Al Jazeera ay ku warantay in boqolaal dagaalyahan ay ku dhaawacmeen. Muuqaallo iyo sawirro laga soo qaaday goobaha qaraxyadu ka dhaceen ayaa si weyn ugu faafaya baraha bulshada, iyada oo dadku ay la yaaban yihiin sida weerarkan uu u dhacay.

Hezbollah ayaa sheegtay in weerarkan uu yahay mid kamid ah dharbaaxyooyinkii ugu weynaa ee sirdoon ee soo gaara kooxda tan iyo markii la aasaasay, taasoo muujinaysa in weerarkani uu yahay mid si heer sare ah loo qorsheeyey oo bartilmaameedkiisu ahaa in lagu wiiqo awoodda isgaarsiineed ee kooxda.

Weerarkan ayaa sidoo kale abuuray su’aalo badan oo ku saabsan sida ay Israa’iil u awoodday inay weerarkan fuliso, iyo haddii kooxda ay wajaheyso khataro ka soo wajahaya dhinaca ammaanka gudaha iyo dibaddaba. Dad badan ayaa aaminsan in tani ay noqon karto bilowga dhibaato cusub oo soo foodsaarta Hezbollah, iyada oo kooxdu ay wajihi doonto baahiyo isugu jira amni iyo isgaarsiin cusub oo loogu diyaar garoobi karo weerarro kale oo noocan oo kale ah.

GAROWE ONLINE