Wiil Soomaali ah oo lagu dilay New Zealand
-
- Posted On 03-10-2021, 08:52AM
AUCKLAND - Caasimadda dalka New Zealand ee Auckland waxaa shalay barqadii lagu dilay Wiil Soomaali ah, kaasoo da'diisu lagu qiyaasay inta u dhaxaysa 20 illaa 30 sano.
Wiilkan oo kasoo jeeda degaanada Puntland ayaa dilkiisa loo adeegsadey rasaas ama xabad, iyadoo lagu soo waramayo inay kooxdiisa dishay oo aan la aqoon ay ka baxsadeen goobta.
Falkan dilka oo ka dhacay xaafad cusub oo dhawaan la dejiyay ayaa cabsi ku beeray Jaaliyadda Soomaalida degan New Zealand, oo sheegay in falkan uu booliska baaritaan ku sameynayo, si cadaaladda loo soo taago kuwa dilay.
Magaaladda Auckland ayaa ka mid ah magaalaayinka ay Soomalida ugu badan ee dalka New Zealand ay deganyihiin, iyadoo sanadihii dambe laga cararay kadib markii falalka beegsiga ah kusoo bateen.
Soomaalida ayaa qaarkood u guurey dalka Australia, si ay carruurtooda u helaan nabad ay ku noolaadaan, waxba ku bartaan maadaama ay yihiin kuwa ka dhaqan iyo diin duwan bulshadda kale ee ay la nool yihiin.
Bishii March 15, sanadkii 2019 nin hubeysan oo nacaybka Islaamka madaxa maray ayaa toogasho ka fuliyay labo Masjid oo ku yaalla magaaladda Christchurch, ee dalka New Zealand, isagoo dilay 51 qof oo Muslim ah oo ku jiray salaadda Jimcaha.
Ninkan oo kasoo jeeda dalka Australia ayaa la qabtay, waxaana uu ku jiraa xabsi ku yaalla dalkan, iyadoo xukuno kala duwan dhawaan lagu riday.
GAROWE ONLINE
