Barnaamijka dimoqraadiyeynta Puntland oo bur bur qarka u saaran
-
- Posted On 19-07-2015, 09:56PM
July 20,2015 (GO)- Warar Garowe Online ka helayo ilo-wareedyo lagu kalsoon yahay ayaa sheegaya in hay'adda Interpeace ee maalgalinta ka hesha Midowga Yurub bishan July dhammaadkeeda albaabada isugu dhufaneyso xafiisyada ay ku leedahay magaalo madaxda Dowlada Puntland ee Garowe.
Hay'adda Interpeace oo gacan weyn ka gaysaneysay hirgalinta barnaamijkii dimoqaradiyeynta Puntland ayaa ku wargelisay Madaxweyne Cabdiweli Cali Gaas iney joojineyso kharashkii ay ku bixin jirtey xafiisyadeeda kadib markii uu dib u dhac balaaran ku yimid dib u biilabista barnaamijkaas.
Warsidaha Garowe Online ayaa fahansan in Madaxweynaha Puntland muddo labo jeer ah ka dalbadey hay'addaas iney dib u dhigto go'aanka ay ku xireyso xafiisyadeeda Puntland.
Madaxweyne Cabdiweli Cali Gaas ayaa ka gaabsadey magacaabista Guddiga Doorashada Puntland sababo aan la shaacin iyadoo Barlamanka horey u ansaxiyey shuruucdii lagu dhaqi lahaa gudigaas.
Barnaamijka xisbiyada badan ayaa waxaa horey u bilaabey Madaxweynihii hore ee Puntland Cabdiraxman Farole balse waxaa la hakiyey kadib markii ay rabshado kala hor yimaadeen inta badan musharaxiintii ka qayb galay doorashadii madaxtinimada ee dhacday sanadkii 2014.
Mudane Gaas ayaa markii la doortay ballan qaadey inuu barnaamijka dimoqaraadiyeynta Puntland dib u bilaabi doono muddo sanad gudhihiis ah.
GAROWEONLINE
