Bosaso: Faah faahin taliyaal xilalkii laga qaaday
-
- Posted On 15-05-2016, 02:03PM
BOSASO- Wareegto kasoo baxday xafiiska madaxweynaha Puntland Cabdiwali Maxamed Cali (Gaas), ayaa lagu sheegay in xilalkii laga qaaday taliyihii ciidanka Boliiska Puntland Sarreeye Guuto Cabdirasaaq Maxamud Yusuf (Afgaduud) iyo taliyihii ciidanka Birmadka G/sare Cismaan Xasan Cuuke (Afdalow).
Xilka qaadista saraakiishan ayaa loo cuskaday talo soo jeedintii ay sameeyeen guddi loo xilsaaray inay baaraan sababta keentay inay isfara saaraan labadaasi taliye, xilli lagu sugnaa xerada ciidanka Birmadku ku leeyihiin magalada Bosaso, taasoo keentay inay lagu dhaawaco wasiirka amniga Puntland iyo ciidamo kale, halka sarkaal kalena ku dhintay.
Qoraalka waxaa sidoo kale lagu sheegay in arrintaasi madaxweyne Gaas u sameeyay isbadal la doonayo in lagu sameeyo ciidamada Booliiska.
Taliye ku-xigeenka ciidanka Booliiska Puntland Sarreeye Cabdulqaadir Shire Farax (Ereg), ayaa si kumeel gaar ah loogu magacaabay booska laga qaaday Afgaduud.
Taliyaha KMG ah ayaa muddo kooban ahaa Taliye ku xigeenka Booliska Puntland isagoo horey isaga casiley gudoomiyaha gobolka Mudug.
Ereg, ayaa la faray inuu si deg deg u soo magacaabo taliyaha ciidamada Birmadka Booliska.
Afdalow ayaa horey isugu difaacay inuusan hoos imaan taliska Booliska Puntland balse hoos yimaado xafiiska madaxweynaha Puntland.
GAROWEONLINE
