Puntland oo qirtey in hay'adaha QM mashariicdii joojiyeen [Dhageyso]

05 September, 2015(GO)-Madaxweyne ku-xigeenka Puntland Cabdixakiim Cabdullaahi Xaaji Cumar Camay ayaa cadeeyay in amniga Puntland uu yahay mid la isku hallayn karo isla markaana aysan jirin falal amni darro oo dhaca.

Waxa uu sheegay inay Hay'addaha UN-ku caddeeyaan meesha laga keenay amni xumada la faafiyay ee sababta u noqotay inay yaraadaan shaqada Qarmada Midoobay ka fulin jirtay Puntland.

Camay oo hadalkan ka sheegay shir ka dhacay Garowe oo dib u eegis loogu samaynayay mashruuca hormarinta degmooyinka Puntland ee JPLG ayaa tilmaamay amni xumada la tuhunsanyahay inay ka jirto Puntland sababtay in mashruucu sanadka 2015 sidii loogu tala galay uusan u fulin.

Ku-xigeenka madaxweynah Puntland ayaa xusay in Hay'adda UN-ka u qaabilsan dhanka bad-baada iyo amniga ee UNDSS ay kulmaan islamarkaana iska xog-waraystaan xaaladda, balse ay doonayaan cidda faafisay xogta sheegaysa ammaan darrada si Puntland uga jawaabto.

Deeq bixiyaasha ayaa Nairobi saldhigyo ka samaystay waxaana mas'uuliyiinta Puntland looga yeeraa dalka Kenya si loogala hadlo mashaariicda Puntland laga fulin lahaa madaama aysan isku hallayn karin inay yimaadaan gudaha Puntland weerarkii April ka dib.

Madaxweynaha Puntland ayaa ku sugan dalka Kenya gaar ahaan Nairobi oo uga qayb galayo shir looga hadlayo kaabayaasha dhaqaalaha Puntland.

"Deeq-bixiyaasha waa maqan yihiin waxaa ay rabaan in Nairobi loogu tago, marka waxbaan idin siinaynaa waana idin ku xukumaynaa hadii ay tahay dib ayaan u eegaynaa" ayuu yiri Camay.

Dhawaan Garowe, waxaa qarax lagu weeraray bas ay saarnaayeen shaqaale ka tirsan UNCEF xilli ay ku socdeen shaqo maalmeedkooda waxaana ku dhintay dhawr ajnabi ah, falkaas ka dibna waxaa yaraaday dhaqdhaqaaqa shaqaalaha Qarmada Midoobay ee Puntland iyagoo ka cabsi qaba weeraro kale madaama xukuumadda Puntland ku guuldaraysatay inay wax ka qabato ammaanka Puntland.

GAROWEONLINE