Galgala: Qarax lala eegtay kolonyo katirsan ciidamada Puntland
-
- Posted On 31-05-2016, 08:35PM
BOSASO- Labo qarax oo kala duwan ayaa lala eegtay ciidamada difaaca Puntland, kuwaasi oo marayay nawaaxiga Buuralayda Galgala ee gobolka Bari, waxaana arrintaasi ka dhashay khaaraaso kala duwan sida wararku sheegayaan.
Qaraxyadan ayaa ahaa miinooyin la dhigay wadada dhinaceeda, waxayna haleeleen baabur kamid ah kuwa ciidamadu saarnaayeen.
Afar Askari ayaa dhaawacmay, waxyeelana waxay soo gaartay gaarigii ay la socdeen.
Dhaawaca ayaa kala duwan, waxaana liita xaaladda mid kamid ah askarta, iyagoo haatan lagu dabiibayo magalada Bosaso xarunta gobolka Bari.
Xukuumadda Puntland ayaa arrintaasi ka hadashay, waxaana wasiirka warfaafinta Puntland uu sheegay in qaraxaasi uusan u dhicin sidii loogu tala galay isagoo beeniyay dhaawaca afarta ah oo uu tilmaamay inay yihiin labo qof.
Maxamud Xasan Soocdde, ayaa xusay inay ka jawaab bixiyeen, waloow uusan sheegin sida ay uga jawaabeen iyo maxsuulka kasoo baxay.
Waa qaraxii saddexaad oo lala eegto ciidamada difaaca Puntland, waxaana mas'uuliyadooda sheegtay xarakada Al Shabaab.
Muddooyinkii dambe, waxaa muuqday in dowladda Puntland ka gaabisay howlgallada ka dhanka ah kooxda Shabaab, waan tan keentay in bil gudaheeda saddex qarax lagu waxyeelleeyo ciidamada difaaca kaga jira Galgala.
GAROWEONLINE
