Hogaan loo doortay xafiiska difaacaha xuquuqda aadanaha Puntland

GAROWE, Puntland – Mudaneyaasha baarlamaanka dowlada Puntland ayaa waxay Axada maanta ah gudoomiye u doorteen Xafiiska Difaacaha Xuquuqda Aadanaha maamulkaan xubinta ka ah federaalka Soomaaliya.

Doorashadda oo ahayd coddeyn qarsoodi ah ayaa martay saddex wareeg oo ay ku tartamayeen saddex murashax oo ay ku jirto ah haweenay kalana ah; Siciid Cabdi Muumin, Maryan Axmed Cali iyo Faysal Mahdi Cali.

Fadhigii maanta ee doorashaddu ka dhacday waxaa goobjoog ahaa 62 kamid ah 66-ka Xildhibaan ee ka tirsan Golaha Wakiiladda.

Faysal Mahdi Cali ayaa ku haray wareega koowaad ee coddeynta kadib markii uu helay 3 cod, taas oo la macno ah in ay soo gudbeen Siciid Cabdi Muumin oo helay 28 Cod iyo Maryan Axmed Cali oo heshay 31 Cod.

Wareega labaad ayaa lagu kala bixi waayey markii ay min 31 cod ay kala heleen Saciid iyo Maryan, sidda guddigu doorashadda shaaciyey, taas oo qasab ka dhigtay in loo baahdo wareeg saddex oo coddeyn ah.

Saciid Cabdi Muumin ayaa ku guuleystay kursiga kadib markii uu helay 34, halka Maryam ay coddeeyeen 28 sharci-dejiyeyaal.

Guuleystaha ayaa isla goobta lagu dhaariyey. Hadal-jeedin uu madasha ka sameeyay wuxuu u mahadceliyey xubihii u coddeeyay, halka Maryam oo aqbashay in laga guuleystay ay u rajeysay wax-qabad.

Sikastaba, yagleelida xafiiska difaacaha xuquuqda aadanaha dowladda Puntland waa mid dastuuri ah, waxaana waajibaadkiisu tahay in uu u ololeeya dhamaan arrimaha ku saabsan arrimaha Xuquuqul Insaanka.

GAROWE ONLINE