Khasaaro kala duwan oo ka dhashay qarax ka dhacay Gaalkacyo

GAALKACYO, Puntland - Qarax aan wali noociisa la xaqiijin ayaa waxaa lagu waramay in Axada maanta ah uu ka dhacay waqoyga magaaladda Gaalkacyo ee xarunta gobolka Mudug.

Fahfaahino horudhac ah ayaa sheegaya in duulaanka lagu beegsaday xarunta gobolka. Khasaaro dhimasho iyo dhaawac ayaana jira. Balse, lama hubo tiradda guud.

Wararka ayaa waxay intaas ku darayaan in bartilmaameedka ay yihiin mas'uuliyiin sar-sarre. Qaraxa wuxuu ka dhacay ilinka hore ee xarunta gobolka.

Ma jirto koox illaa iyo haatan dusha saaratay mas'uuliyadda falkaas. Balse, waxaa dhacdooyinkaan oo kale ka fuliya koonfurta iyo bartamaha Soomaaliya xoogaga Al-Shabaab.

Laamaha ammaanka oo gaarey meesha ay wax ka dhaceen ayaa sheegay in ay fahfaahin siin doonan warbaahinta kadib marka ay dhameeyaan baaritaanka.

Sawirro laga soo qaadey meesha ay wax ka dhaceen ayaa muujinaya burbur soo gaarey dhismeyaal iyo gaadiid kale oo ku gubtay meesha ay wax ka dhaceen.

Gaalkacyo oo maalmihii lasoo dhaafay ay ka socdeen howlgalo lagu sugayo nabad-gelyadda waxaa dhanka koonfur maamula Galmudug, halka Waqooyi ay hoostagto dowlada Puntland.

GAROWE ONLINE