Maamulka Bari oo barakacayaasha kala shiray ammaanka
-
- Posted On 14-04-2016, 01:59PM
BOSASO- Maamulka gobolka Bari ayaa maanta kulan la qaatay xubno matalayay bulshada barakaacayaasha ah ee ku dhaqan xarunta ganacsiga Puntland ee Bosaso, waxaana kulankasi looga hadlayay ammaanka iyo qaabkii looga hortagi laha waxyaabaha keeni kara xasilooni darrada.
Axmed Cabdullaahi Cali, gudoomiye ku xigeenka gobolka Bari ayaa warbaahinta faah faahin ka siiyay shirkaasi iyo waxyaabaha diiradda lagu saaray isagoo sheegay inay isku afgarteen xaqdhowr loo sameeyo wada noolaanshaha iyo Islaanimada.
Cali, ayaa tilmaamay inay isla meeldhigeen xuquuqda dadka barakacayaasha ah ku leeyihiin gobolka Bari, wuxuuna tilmaamay inay dadkaasi leeyihiin xuquuqda ay heelaan shacabka u dhashay Puntland.
Maamulka gobolka Bari, ayaa tilmaamay in isla meeldhigeen sidii Barakacayaashu isaga dhex dooran lahaayeen 5 qof oo kamid noqda nabadoonnada gobolka, kuwaasoo laamaha ammaanka ka caawiya ilaalinta nabadgalyada islamarkaana goob joog ka noqda shirarka gobolka ka dhaca.
"Waxaa isla garanay in dadka Koonfur kayimi ha ahaadeen Digil iyo Mirifle ama ha ka yimaadeen Jubbooyinka inay noqdaan reer Bosasood, waa dadka gobolka u dhashay intaas oo sano daganaa carruurtooda xitaa qayb ayaan aqoon Af-Mayga sababtoo ah halkaan ayay ku dhasheen Iskullada ayayna dhigtaan,"Sidaasi waxaa yiri gudoomiye ku-xigeenka gobolka Bari.
Maaha kulankii ugu horaysay ee dhexmara maamulka gobolka Bari iyo barkacayaasha ku dhaqan xarunta ganacsiga Puntland ee Bosaso, balse wuxuu kusoo aadayaa xilli la adkeeyay ammaanka Puntland iyadoo laga hortagayo falal amni darro ay fuliyaan kooxaha nabad diidka ah.
GAROWEONLINE
