Madaxweyne ku xigeenka Puntland oo dhagax dhigay Jidka Eyl iyo Dongoroyo
-
- Posted On 05-10-2015, 05:36PM
05 September, 2015(GO)-Wafdi uu hogaaminayo ku-xigeenka madaxweynaha Puntland ayaa maanta gaaray degmooyinka Dongoroyo ee gobolka Nugal, waxayna dhagax dhigeen dhismaha jidka isku xiri doona Eyl iyo Dongoroyo.
Dhaqaalaha lagu dhisayo waddada ayaa ah mid shacabka deegaanku iska aruuriyeen, waxaana boqolkiiba konton ballan qaaday Gudoomiyaha guddiga dhismaha wadada Aadan Maxamed Ciise Gaadaale.
Mas'uuliyiinta uu hogaaminayay Camay ayaa la kulmay dadka deegaanka ka hor dhagax dhiga, waxayna ka wada hadleen dhismaha jidka labada degmo isku xiri doona iyo qaabkii looga qayb qaadan lahaa dhismihiisa.
Barnaamijka wadada loogu samaynayo degmooyinka ka tirsan gobolka Nugal waxaa soo dhaweeyay shacabka deeganadaasi oo sheegaya inay diyaar u yihiin bixinta kharashka lagu dhisayo intii awoodooda ah.
Madaxweyne ku-xigeenka Puntland Cabdixakiim Cabdullaahi Xaaji Cumar Camay ayaa sheegay inay soo dhaweynayaa barnaamijka xukuumaddu waddo ee isku tashiga, balse ma caddayn kaalinta dowladda Puntland ka qaadan doonto hadii ay ahaan lahayd dhinac dhaqaale iyo taageero kaleba.
Dhismaha waddada isku xirta Dongorayo iyo Eyl ayaa la bilaabayaa bisha soo socota, waxaana dhinac socda dhaqaale uruurin ay wadaan guddi hawshaasi loo xilsaaray.
GAROWEONLINE
