Mareykanka oo duqeyn cirka ah ka fuliyay Buuraleyda CalMiskaad ee Puntland

BOSASO, Puntland — Ciidamada Mareykanka ayaa xaqiijiyay in ay laba duqeyn cirka ah ka fuliyeen kooxaha ISIS-Somalia ee ku sugan buuraleyda Al Miskaad ee gobolka Bari, Puntland. Buuraleydan oo qayb ka ah silsiladda Golis, ayaa muddo dheer u adeegaysay goob sir ah oo ay ka dhuuntaan dagaalyahannada xiriirka la leh ISIS ee ka howlgala deegaanada fog ee Puntland.

U.S. Africa Command (AFRICOM) ayaa sheegtay in duqeymaha la fuliyay Oktoobar 24 iyo 26, qiyaastii 85 kiiloomitir koonfur-bari kaga beegan Bosaso, oo ah deked istiraatiiji ah oo ku taal Gulf of Aden.

Bayaan ay AFRICOM soo saartay ayaa lagu sheegay: "AFRICOM, iyadoo kaashaneysa Dowladda Federaalka Soomaaliya iyo Ciidamada Qalabka Sida ee Soomaaliya, waxay sii wadaysaa tallaabooyinka lagu daciifinayo awoodda ISIS-Somalia ee khatarta ku ah dalka Mareykanka, ciidamadeena, iyo muwaadiniinteena dibadda."

Ciidanka Mareykanka ma aysan shaacCiidanka Mareykanka ma aysan shaacin tirada khasaaraha ama faahfaahinta howlgalka, iyaga oo xusay cabsi amni. in tirada khasaaraha ama faahfaahinta howlgalka, iyaga oo xusay cabsi amni. Tan iyo bishii Abriil, AFRICOM waxay sidoo kale joojisay sii deynta warbixinada ku saabsan waxyeelada shacabka.

Mas’uuliyiin ka tirsan Puntland ayaa xaqiijiyay in ciidamada amniga maxalliga ah ay kordhiyeen howlgalada lagula dagaallamayo unugyada ISIS ee Al Miskaad, iyagoo si dhow ula shaqeynaya AFRICOM dhinacyada sirdoonka iyo taageerada saadka. ISIS-Somalia ayaa ka howlgala Puntland tan iyo markii ay ka go’day al-Shabaab ku dhawaad toban sano ka hor, iyagoo adeegsanaya godadka iyo dooxooyinka buuraleyda si ay isu tababaraan, isu abaabulaan, iyo farsamooyin geriilla ah si ay uga baxsadaan duqeymaha cirka iyo howlgalada dhulka.

Maamulka Puntland ayaa sheegtay guulo dhowaan la gaaray, iyaga oo kooxda u arkay in si weyn loo jabiyay, in kastoo warbixinno ka imaanaya deegaanadaasi ay muujinayaan iska caabin weli jirta.

ISIS-Somalia ayaa markii ugu horreysay soo shaac baxday 2015, ka dib markii ay ka go’day al-Shabaab sababo la xiriira khilaafaad gudaha ah. Kooxdu waxay saldhig ka dhistay buuraleyda fog ee Puntland, iyagoo sidoo kale ku kala firdhiyey unugyo yar-yar oo ku sugan waqooyiga Soomaaliya.

Duqeymaha cusub ee cirka ah ayaa muujinaya diiradda cusub ee Washington ku saaran Puntland, halkaas oo ciidamada Mareykanka iyo kuwa Soomaaliya ay sanadkan isku dubarideen howlgalyo badan. Duqeymahan ayaa sidoo kale qayb ka ah ololaha guud ee Mareykanka ee Soomaaliya, iyadoo AFRICOM ay sii wadday duqeymaha cirka ee taageerada u ah dagaalka Dowladda Federaalka Soomaaliya ee ka dhanka ah al-Shabaab ee gobollada dhexe iyo koonfureed.

Sida ay sheegtay Antiwar.com, duqeymahan ayaa tirada guud ee duqeymaha Mareykanka ee Soomaaliya sanadka 2025 gaarsiiyay 86, taas oo ka badan rikoodhkii hore ee sanadka. Maamulka Trump ayaa rikoodh hore dejiyay sanadkii 2019 oo ahaa 63 duqeyn, halka Madaxweyne Biden uu ogolaaday 51 duqeyn muddo afarta sano ah.

Mareykanka wuxuu ka hawlgalaa howlgalada ka dhanka ah argagixisada ee Soomaaliya tan iyo 2007, kadib taageeradiisii ku aaddaneyd galkii Itoobiya ee ka saaray Isbahaysigii Maxkamadaha Islaamiga oo muddo gaaban ka talin jiray Muqdisho. Al-Shabaab ayaa ka dhalatay dhaqdhaqaaqaas, halka ISIS-Somalia ay ka go’day waqooyiga Soomaaliya.

AFRICOM ayaa ku adkaysay in ay sii wadi doonto iskaashiga Dowladda Federaalka Soomaaliya si loo carqaladeeyo hawlgallada argagixisada loona ilaaliyo danaha Mareykanka iyo la-hawlgalayaasha gobolka.

GAROWE ONLINE