Mashaariic Puntland laga wareejiyay
-
- Posted On 02-06-2016, 04:16PM
Xildhibaan Cabdibarre Yuusuf Jibriil oo ka mid ah Barlamanka Federalka Soomaaliya ayaa sheegay in mashaariic dhawr ah oo ay Puntland leedahay loo wareejiyay dhinac maamulka Galmudug.
Cabdibarre, ayaa ku sheegay mashaariicda la wareejiyay inay yihiin kuwa kasocda gobolka Mudug gaar ahaan kuwa lagu dhisayo wadada Wadaagsin iyo dekedda deegaanka Garacad, wuxuuna tilmaamay in loo wareejiyay degmada Hobyo ee Galmudug.
Arrintan ayuu sheegay inay ka shaqeeyeen madaxweynaha Galmudug oo kaalin ka helay xukuumadda Federalka Soomaaliya gaar ahaan Ra'isal wasaare ku-xigeenka dowladda Maxamed Cumar Carte.
Xildhibaanku wuxuu intaasi raaciyay in beesha caalamka ee deeqda bixisay ay saxiixeen in mashaariicdan oo gabo gabo maraysay loo weeciyo dhinaca Galmudug.
Wuxuu tilmaamay in arrintan soo shaac baxday labadii Todobaad ee ugu dambaysa iyadoo xukuumada Puntland ka war heshay 24-kii saac ee lasoo dhaafay.
Xildhibaanka oo la hadlay Radio Daljir, ayaa xusay inay tahay wax laga xumaado tallaabada lagu leexinayo mashaariicda socda isagoo qadiyad xun ku tilmaamay kala jeclaysiga dalka.
Majirto wax war ah oo kasoo baxay dowladda Puntland, kaasi oo ku aadan mashaariicday la sheegay in la leexsaday, balse waxay kusoo beegantahay xilli maamulka Galmudug uu wado mashruuc uu ku ballaarinayo dekedda degmada Hobyo ee gobolka Mudug.
GAROWEONLINE
