Nicholas Kay oo Puntland ugu baaqay inay sii dayso Deparani
-
- Posted On 24-11-2015, 11:14AM
24 November, 2015(GO)-Danjiraha Qaramada Midoobay u qaabilsanaa Somalia Nicholas Kay oo maanta ka qayb galay shirweynaha ee warbaahinta kaasi oo ka furmay magalada Muqdishu, ayaa ku baaqay in maamulka Puntland sii daayo Wariye Jaamac Yusuf Deparani oo muddo lix bari ku xiran magalada Garowe.
Nicholas Kay, ayaa sidoo kale ku baaqay in la ixtiraamo qaanuunka u dagan dalka iyo xirriyadda qofku leeyahay.Saxaafadda ayuu ugu baaqay inay dhankooda ilaaliyaan dastuurka dalka.
Goobta hadalkan uu ka jeediyay danjiruhu, waxaa ka socday shir hal maalin, waxaana ka qayb galay mas'uuliyiin ka socota maamul goboleedyada, wariyaal iyo xubno ka socda dowladda Federaalka oo shirkaasi marti galisay.
Sida ay baahiyeen saxaafadda Muqdishu, waxaa Puntland kulankaasi uga qayb galay Afhayeenka Madaxtooyada Puntland Cabdullaahi Maxamed Jaamac Quraan Jecel.
Kay, ayaa sidoo kale goobta ka cadeeyay kulankan inuu noqon doono kii ugu dambeeyay ee ka qayb galayo maadaama xilkiisa dhammaday, Xoghaya guud ee Qaramada Midoobay Ban Ki-Moon soo magacaabay badalkiisa oo u dhashay dalka Ingiriiska.
GAROWEONLINE
