Puntland: Ku dhawaad 13 kun Arday oo Imtixaan u fariistay
-
- Posted On 20-05-2017, 10:55AM
GAROWE, Puntland- Imtixaanka Shahaadiga ah ee dugsiyada Sare iyo Dhexe ee deegaanada Puntland ayaa maanta ka furmay 84 xarumood oo ku yaalla gobollada kala duwan ee dowlad goboleedkaas.
Imtixaankan oo sannadkiiba mar la qabto ayaa waxaa u fariistay Arday gaaraysa 12700 oo Arday kuwaasoo isugu jira Wiilal iyo Gabdho.
Madaxweyne ku-xigeenka Puntland iyo xubno katirsan dowladda ayaa ku daah furay magaalada Qardho.
Magacaalada Garowe gaar ahaan Dugsiga Sare ee Gambool oo ay ku galayeen in kabadan 400 Arday, ayaa waxaa daah furay Guddoomiyaha Barlamanka Axmed Cali Xaashi oo uu weheliyo Agaasimaha guud ee wasaaradda Waxbarashada.
Maamulaha Dugsiga Sare ee Gambool Cali Suudaane oo la hadlay GO, ayaa sheegay inuu aad ugu faraxsanyahay guusha ay joogaan Ardayda Imtixaanka u fariisatay, wuxuuna ALLE uga baryay inuu u sahlo.
Guddoomiye Xaashi ayaa Ardayda kula dar-daarmay inay istajiyaan kalsooni dheeraad ahna muujiyaan si Imtixaankoodu u noqdo mi fudud.
Wuxuu ugu hambalyeeyay Ardayda dadaalka ay usoo galeen inay heerkaas soo gaaraan, isagoo waalidiinta iyo macallimiintii wax soo bartay ku ammaanay hormarka waxbarashada ee ay ka qayb qaateen.
Dhinaca kale waxaa Koonfurta dalka Somalia maanta si rasmi ah uga furmay Imtixaanka Shaahaadiga ah ee dusiyada dhexe iyo sare.
GAROWEONLINE
