​Puntland: Madaxtooyada oo xaqiijisay hishiis laga gaaray colaadda Galkacyo

GAROWE, Puntland- War-saxaafadeed kasoo baxay madaxtooyada Puntland, ayaa lagu xaqiijiyay in war-murtiyeed laga soo saaray shir madaxda maamullada dalka Somaliya ku 30 October, 2016 ilaa 01 November, 2016, kaasoo looga hadlay arrinta magaalada Galkacyo xarunta gobolka Mudug.

Qoraalka soo baxay, ayaa la sheegay in labada dhinaca Puntland iyo Galmudug ku hishiiyeen Shan qodob oo kala ahaa;

1. In xabad joojin si deg deg ah labada dhinaca u dhaqan galiyaan
2. In la joojiyo wax kasta oo abuuraya colaad oo la isu mariyo hawada
3. Inay dib ugu soo laabtaan magaalada dhammaan dadkii ka barakacay
4. In labada dhinac soo magacaabaan guddi isku dhaf ah oo ka shaqeeya sidii xal waara looga gaari lahaa khilaafka soo noq-noqday
5. In kulan deg deg ah oo lagusoo afjarayo khilaafkan la isugu yimaado magaalada Kismayo 20 November, 2016.

Hishiiskan, ayaa yimid xilli uu fashilmay hishii sannadkii hore dabayaaqadiisa labada ku gaareen magaalada Galkacyo xarunta gobolka Mudug.

Qoraalkan, ayaa soo baxay kadib markii madaxda maamullada marka laga reebo Axmed Madoobe kasoo amba baxeen magaalada Dubai, waxaana diyaarad khaas ah soo wada raacay Cabdiwali Cali Gaas iyo Cabdikariim Guuleed oo ay weheliyaan madaxda maamullada Hir-Shabeelle iyo Koonfur Galbeed.

GAROWEONLINE