Puntland: Maxkamadda gobolka Nugal oo fasaxday Universal TV
-
- Posted On 05-04-2017, 02:51PM
GAROWE, Puntland- Maxkamadda Darajada Koowaad ee gobolka Nugal ayaa maanta go’aan ka gaartay kiis muddo soo socday oo u dhaxeeyay TV-ga Universal iyo dowladda Puntland oo ka caroortay muuqaal ku baxay barnaamijka Faaliyaha Qaranka.
Doodda saaka oo ay joogeen bahda warbaahinta iyo qareenada u doodayay labada dhinac ayaa ugu dambayntii laga soo saaray dhowr qodob oo ay ku jirtay in la fasaxo TV-gan oo dowladda u xirnaa 32 casho.
Maxkamadda ayaa go’aamisay qodobadan;
In dib xoriyaddiisa u helo TV-ga Universan oo horay dowladdu u mamnuucday in laga daawado gudaha Puntland
In TV-ga laga qaado lacag gaaraysa $2000
Iyo in wasaaradda Warfaafintu ay bixiso lacag dhan $25,600 taasoo ah magdhow ku aadan lacagihii ka baaqday TV-ga mudadii uu xirnaa.
Intaas kadib bahda warbaahinta Puntland gaar ahaan ururka MAP, aya soo dhaweeyay go’aanka Maxkamaddu ku dhawaaqday.
Wasaaradda Warfaafinta Puntland ayaa dhowr jeer oo hore amarro kala duwan ku xirtay warbaahinta Somalida qaybtood, waxayna maxkamad isla tageen hadda kahor Idaacad ku taalla magaalada Garowe oo lagu qabsaday inay baahisay war aysan dowladdu jeclahysan.
GAROWEONLINE
