Puntland oo u digtay shirkadaha daneeya shidaalka Soomaaliya

GAROWE, Puntland - Dowladda Puntland ayaa maanta oo Talaado ah waxay go'aano kasoo saartay sharciga Batroolka oo uu todobaadkan qalinka ku duugay madaxweyne Maxamed Cabdullaahi Farmaajo.

Xeerkaan oo ka gudbay labada aqal ee baarlamaana federaalka ayay mudaneyaasha Puntland ku metela Aqalka Sare sheegeen in lagu ansixiyey hanaan sharciga banaankiisa ah.

Sidda ku xusan qoraal uu arkay Garowe Online, iyaddoo ka duuleysa qodobada dastuurkiga ah ee xeerkaas uu baalmarsan yahay, Puntland waxay qaadatay go'aanadaan soo socda;

Goleyaasha sharci-dejinta federaalka ayaa horey u meelmariyey shuruuc aan laga talagelin maamulada ama gebi ahaanba kasoo horjeesteen iyagoo cuskanaya qodobo ku jira.

Hindise sharciyeedyadaas oo masiiri ah waxaa kamid ah; duulista rayidka, doorashooyinka, oo madaxweynuhu wali saxiixin, iyo batroolka.

Xubnaha Puntland ku metela Sanate-ka ayaanan ka qeybgelin fadhiyadda muhiimka ah ee looga doodayo shuruucda, waxaana ay ka gadoodsan yihiin arrintaan oo aan wali xal loo helin.

Madaxweyne Farmaajo, oo dhowr jeer lagu waaniyey in uusan saxiixin shuruucda dooda ka taagan tahay sidda midka batroolka iyo doorashooyinka, ayaa u muuqda mid aan dheg jalaq u siin.

Madaxweyne Saciid Cabdullaahi Deni ayaa iclaamiyey shir wadatashi ah oo looga hadli doono mustaqbalka Puntland iyo kaalinteeda dowladnimadda Soomaaliya. Kulanku wuxuu 15-ka Maaj ka dhacayaa Garowe.

GAROWE ONLINE