Puntland oo hakisay doorashooyinka Aqalka hoose [Akhriso]
-
- Posted On 28-11-2016, 03:15PM
GAROWE, Puntland- Wareegto kasoo baxday xafiiska Madaxweyne ku-xigeenka Puntland Cabdixakiim Cabdullaahi Xaaji Cumar Camay, ayaa maanta lagu hakiyay doorashooyinka dadban ee kasocday magaalada Garowe gaar ahaan Aqalka hoose.
Qoraalkan oo la sheegay inuu daba socdo mid kasoo baxay Madaxweyne Gaas 25 November, 2016 ayaa lagu wargaliyay in ilaa amar dambe Puntland joojisay doorashooyinkii socday.
Arrintan ayaa la sheegay inay la xiriirto kuraaska Aqalka hoose ee ka imaanaysa Sool, Bariga Sanaag iyo Buuhoodle oo ay ku muransanyihiin maamullada Puntland iyo Somaliland, taasoo qoraal dhawaan uu soo saaray Guddoomiyaha Barlamanka waqtigu ka dhammaaday Maxamed Sheekh Cusmaan Jawaari oo ku qaybiyay kuraasta halkaas ka imaanaysa.
25 bishan, ayaa Madaxweyne Gaas arrintaas ka hadlay isagoo xusay inay tahay arrin aan u ollin Jawaari, balse xal ka gaari karaan madaxda Madasha oo kaliya.
Wuxuu ugu baaqay xubnahaas iyo beesha Caalamka in la joojiyo qoraalada xalka looga gaarayo arrimaha jira, isagoo xusay inay tahay tallaabadaas Jawaari mid lagu carqaladaynayo doorashada Aqalka hoose.
War-saxaafadeedka Camay, ayaa u muuqda mid ay isku raacsanyihiin Madaxweyne Gaas.
Majirto ilaa hadda wax war ah oo kasoo baxay dhinaca dowladda Federaalka Somalia iyo Guddiga doorashooyinka dadban ee Somalia.
GAROWEONLINE
