Puntland oo ka hortimi xayiraad la saaro hishiisyada shidaalka
-
- Posted On 12-10-2015, 10:39AM
12 Octobar, 2015(GO)-Hay'adda Puntland u qaabilsan shidaalka iyo macdanta ayaa ka hortimi warbixin dhawaan soo saartay kooxda Qaramada Midoobay ee la socodka cunno-qabateynta hubka ee dalalka Somalia iyo Eritrea oo looga hadlay shidaal laga baaro Somalia.
Agaasimaha hay'addaasi Ciise Maxamed Faarax(Dhoolawaa) ayaa sheegay inaysan aqbali doonin in la joojiyo sahaminta shidaalka maadama dalka Somalia uu haatan ka baxay colaadihii sokeeye, islamarkaana doonayaan hormaro laga sameeyo dhinacyada dhaqaalaha.
"Waxay aheyd qalad in Qaramada Midoobey xayiraad saarto qaran mar dhow ka soo baxay dagaal sokeeye, diyaarna u ah inuu sameeyo horumar siyaasadeed iyo mid dhaqaale" Ayuu yiri Ciise Maxamed Faarax.
Dhoolawaa aya sidoo kale soo jeediyay in Qaramada Midoobay ka caawiso nidaam lagu maamuli karo dakhliga shidaalka.
Dowladda Somalia iyo shirkadda "Soma Oil and Gas" oo fadhigeedu yahay wadanka Britian oo la siiyay qandaraaska baarista shidaalka Somalia ayaa iyagana ku gacan-sayray talo soo jeedinta kooxda.
Dhawaan ayaa warbixin ay soo saartay kooxda Monitaring group, waxaa lagu sheegay hadii Somalia laga bilaabo shidaal baaris in dalku ku laabanayo fawdo iyo qalalaaso siyaasadeed maadama aysan lahayn Somalia sharci xakamayn kara dakhliga macdanta iyo shidaalka.
GAROWEONLINE
