Puntland oo qabatay burcad-badeed $5 milyan ku heshay afduubka markab

Lama xaqiijin in lacagtii madax-furashada ahayd ee la siiyay burcad-badeedda la soo qabtay intii howlgalku socday.

GAROWE, Puntland - Burcad-badeedda Soomaaliyeed ayaa sii daayay markabka MV Abdullah kadib markii ay heleen madax furasho dhan $5 milyan, sida ay xaqiijiyeen mas’uuliyiinta maxalliga ah.

Markabka laga leeyahay Bangladesh ee watay calanka dalka Malta laguna magacaabo MV Abdullah oo ay saarnaayeen shaqaale dhan 23 qof ayaa la afduubay bartamaha bishii Maarso.

Sarkaal sare oo ka tirsan Ciidamada Booliiska Puntland ayaa Garowe Online u sheegay inay qabteen 8 xubnood oo ka tirsan kooxdii burcad-badeedda ee haystay markabka MV Abdullah.

Lama xaqiijin in lacagtii madax-furashada ahayd ee la siiyay burcad-badeedda la soo qabtay intii howlgalku socday. Wararka qaar ayaa xusaya in lacagta aan lagu bixin qaab cadaan ah.

"Bixinta madax furashooyinka ayaa laga yaabaa inay sii kordhiso weerarada burcad-badeedka," ayuu yiri sarkaal ka tirsan booliiska Puntland oo codsaday inaan magaciisa la shaacin.

Dhacdadan ayaa imaanaysa iyadoo ay hoos u dhacayaan weerarrada burcad-badeedda ee xeebaha Soomaaliya, taas oo qeyb ahaan ugu wacan tahay dadaallo ay si wadajir u sameeyaan caalamka.

GAROWE ONLINE