Puntland: Wufuud ku wajahan Magalada Bosaso
-
- Posted On 01-05-2016, 09:26AM
BOSASO- Waxaa maanta lagu wadaa in magalada Bosaso xarunta gobolka Bari tagaan wufuud kasocota dalka Talyaaniga iyo urur goboleedka IGAD, kuwaasi oo iska kaashanay dhismaha wajiga labaad ee garoonka diyaaraha magalada Bosaso xarunta gobolka Bari.
Wufuudan, ayaa qayb ka noqonaya dhagax dhiga qaybta harsan madaarka kaasoo la filayo in maalmaha soo socda dhagax dhigo madaxweynaha Puntland Cabdiwali Maxamed Cali Gaas.
Gaas ayaa shalay soo gaaray Bosaso, waxaana ujeedka imaanshihiisa lagu sheegay arrinta garoonka iyo wada-xaajood waxgaradka gobolka Bari uu la yeelanayo.
Deeqda lagu dhisayo garoonka ayaa waxaa keenay dowladda Talyaaniga oo taageero ka helay Sanduuqa loo yaqaano Global Fun, waxaana gacan ka gaysanaysa ururka IGAD oo damaanad qaaday xilligii garoonka wajigiisa koowaad la furayay inay keenayaan.
Ammaanka magalada ayaa aad loo adkeeyay, waxaana soo gaaray mas'uuliyiin badan oo doonaya inay qayb ka ahaan munaasabadda lagu dhagax dhigayo madaarkaa xarunta ganacsiga Puntland, waxaana sidoo kale la filayaa in caawa la qabto munaasabad mas'uuliyiinta imaanaysa lagu soo dhaweynayo.
GAROWEONLINE
