Qarax khasaare geystey oo ka dhacay deegaanka Galgala

December 12, 2014 (GO)- Ugu yaraan saddex askari oo ka tirsan ciidamada Puntland ayaa geeriyoodey afar kalena way dhaawacmeen kadib markii miino la kacday mid kamid ah gaadiidka dagaalka ee ciidamada Puntland.

Qaraxa oo sida lagu soo waramayo ka dhashay miino nooca dhulka lagu aaso ah, wuxuu duhurnimadii maanta ka dhacay meel u dhow deegaanka Galgala.

Saraakiisha hay'adaha ammaanku weli qaraxan iyo khasaaraha uu geystey wax war ah kama soo saarin, sidoo kale ma jirto cid ilaa iyo hada mas'uuliyadda weerarkaas sheegatey.

Ciidamada Puntland ayaa ku guuleystey labo bilood kahor inay la wareegaan fariisimihii kooxda Al-shabaab ku lahayd deegaanka Galgala iyo buuraha ku xeeran.

Buuraleyda Golis waxaa saddexdii sano ee lasoo dhaafay ka dhacay dagaallo qaarkood khasaare nafeed oo badan geysteen oo dhex maray ciidamada ammaanka Puntland iyo Al-shabaab.

GAROWE ONLINE