Qarjab oo ka hadlay dilka Taliye Baakistaan [DHEGEYSO]
-
- Posted On 28-07-2015, 09:16AM
July 28, 2015 (GO)- Wasiirka Amniga Puntland Cabdi Xirsi Cali "Qar-jab" ayaa Radio Garowe uga waramay halka ay marasyso baarista cidii ka danbeysay dilka taliyihii saldhigga booliska dhanka bari ee degmada Garowe, Siciid Bakistaan Bulshaale.
Wasiirka ayaa sheegay in lasoo xiray askarigii ka danbeeyay dilka taliyaha iyo dhowr qof oo kale oo arrintaas ku lug lahaa.
"Ciddii sarkaalka dilkiisa ka danbeysay iyo dadka falkaasi ku lug lahaa baaritaan buuxa ayay u baahan tahay, laakiin ciidankii falkaas ku lugta lahaa gacan ayaa lagu hayaa, waxaana loo diray afar hay'adood si ay u baaraan, baaritaankaasi ka dib wixii ay mutaystaan bay sharciga ka helayaan" ayuu yiri Wasiir Qar-jab.
Dhanka kale, Wasiirka Amniga ayaa xusay in la xiray gabadh uu sheegay in iyada sababteeda fowdadu ka dhalatay, loona gudbin doono xabsiga weyn ee degmada Qardho, inta maxkamad laga soo taagayo.
Ugu dambeyntii wuxuu sheegay in gebi ahaanba la bur burinayo goobta ay shaqaaqadu ka dhacday oo ku taal Jidka Meeraysane.
Goobtaas oo masaafo aan badneyn u jirta Xarunta Qaramada Midoobey ee Garowe, waxaa ku yaal suuq qaadka lagu gado iyo maqaayado yaryar oo lagu qayilo.
GAROWE ONLINE
