Shirkadda Tawakal oo lacag ugu deeqday Abaaraha iyo Garoonka diyaaradaha Garowe
-
- Posted On 02-01-2017, 10:39AM
GAROWE, Puntland- Xawaaladda Tawakal, ayaa lacag ugu deeqday Abaaraha ka jira deegaanada Puntland iyo casriyaynta lagu samayn doono garoonka diyaaradaha magaalada Garowe oo haanta dhismihiisu gabo-gabo marayo.
Tawal, ayaa Guddiga loo xil-saaraya abaaraha Puntland ku wareejisay lacag gaaraysa $10,000 [Toban Kun oo Dollar], oo ay sheegeen inay uga qayb qaadanayaan sidii wax loogu qaban lahaa dadka tabaalaysan.
Maamulka Sare ee Shirkadda ayaa xaflad ay ku daah furayeen Adeeg cusub ku guddoonsiiyay lacagtaas Sheekh Cabdiqani Qorane oo kamid ah Guddiga Abaaraha loo xilsaaray.
Dhinaca kale, Xawaaladda Tawakal, ayaa lacag gaaraysa 5,000 oo doollar ugu deeqday dhismaha garoonka diyaaradaha caasumadda Puntland oo lagu samayn doono casriyayn ku aadan inuu noqdo mid caalami ah oo habeen iyo maalin la isticmaali karo.
Deeqdan ayaa qayb ka ahayd kaalmo laga dhowrayay dhammaan shirkadda ka howlgala magaalada.
Duqa degmada Garowe Xasan Maxamed Ciise Goodir, ayaa Jeegga lagu muujiyay lacagtaas ka guddoomay maamulka Shirkadda, wuxuuna uga mahad-celiyay sidii ay ugasoo bexeen qaaraankii looga baahnaa.
Bixinta lacagta ee Xawaaladda Tawakal, ayaa timid xilli labaad arrimood dhaqaale u uruurintooda loo xil-saaray Guddiyo isku dhaf ah oo kasocda qaybaha kala duwan ee bulshada iyo dowladda.
GAROWEONLINE
