Sidee loo fashiliyey weerar ay Daacish ka fulin rabtay Boosaaso?

BOOSAASO, Puntland – Ciidamo ka tirsan askarta PSF oo gaari ku marayey bartamaha suuqa caanaha magaalada Boosaaso ayaa waxaa ku weerarey labo nin dabley ah oo ku hubeysan bistoolado.

Askartaan oo gaarigoodu ahaa nooca loo yaqaan Barbookiska waxaa tiradoodu aheyd Saddex, waxaana rasaas la beegsadey labo nin oo Saraakiisha amniga sheegtey iney ka tirsanaayeen Daacish.

Weerarkaa waxaa ku dhintey askari, islamarkaana ku dhaaawacmey mid kale, halka askarigii ay u suurgashay inta oo gaarigii ka baxo dilo mid kamid ah dableydii halka uu dhaawac u gaystey mid kale.

Ciidamo boolis ah oo gurmad ahaan goobta u yimid ayaa racdeystay mid kamid ah dableyda oo isku dayey in uu baxsado, hase ahaatee, nolosha ayay kusoo qabteen. Hadda wuxuu ku jiraa gacanta ciidamada.

Dhacdadaan ayaa laga soo wariyey agagaarka dhismaha shirkadda isgaarsiinta Golis, faraceeda xarunta ganacsiga dowladda Puntland.

Sidoo kale, waxay ciidamaddu gacanta kusoo dhigeen agab ay kamid yihiin waxyaabo qarxa oo maleeyshiyaadka ay wateen iyo gaari ay wateen.

Saraakiisha ammaanka ayaa sheegay in dableyda ay Daacish ahaayeen isla markaana iyaga iyo gaarigooda oo miineysan ay ku raadjoogeen maalmihii dambe isla markaana xogtiisa ay si buuxda u hayeen.

Boosaaso waxaa bilooyinkii lasoo dhaafay ka socday howlgalo lagu xaqiijinayo ammaanka oo ay sameynayeen Hay'addaha Nabad-gelyadda, waxaana muuqaneysa in dedaaladaas ay miradhalayaan.

GAROWE ONLINE