Taliyaha Guud ee ciidamaa Puntland oo ka hadlay dagaalladii Garmaal iyo Garacad
-
- Posted On 24-03-2016, 07:10PM
GAROWE- Waxaa maanta deegaanka Garacad ee gobolka Mudug lagu soo bandhigay maxaabiis iyo hub lagu qabtay dagaallo mudooyinkii dambe gobolkaasi ka dhacayay, waxaana sidoo kale lagu faah faahiyay khasaarihii ka dhashay.
Goobta arrimahaasi lagu soo bandhigay waxaa ku sugnaa madaxweynaha Puntland oo weheliyaan xubno katirsan golayaasha Fulinta iyo Sharci dajinta, taliyaha guud ee ciidamada qalabka sida iyo saraakiil kale.
Taliyaha guud ee ciidamada qalabka sida Puntland Siciid Maxamed Xirsi "Siciid Dheere", ayaa kawaramay khasaarihii ka dhashay dagalladii lala galay kooxda Shabaab ee ka dhacay gobollada Nugal iyo Mudug ee Puntland, wuxuuna cadeeyay in dagaalkaasi lasoo gabagabeeyay isla markaana ku dileen kooxihii soo duuley aagga garacad oo keliya 208, ayna soo qabteen 46 Maxbuus, sidoo kale agab ciidan oo ka kooban 165qori oo isug jira BKM, AK47, Baasuuke 7 (RPG 7), F1 bumbo.
General Siciid Dheere ayaa tilmaamay in gacanta lagu dhigay agabyo kale oo qarxa iyo kuwo loo isticmaalo Isgaadhsiinta ciidamada.
Howlgalkaasi ayuu xusay in dagaalkaasi ciidamada Puntland kaga shahiideen 20 askari iyadoo dhaawacyo kala duwan soo gaareen 60 kale.
Madaxweynaha Puntland Cabdiwali Maxamed Cali Gaas, ayaa dhankiisa ka hadlay qorshayaasha dowladiisa ee ku aadan ciidamada difaaca Puntland, wuxuuna xusay inay daryeeli doonaan islamarkaana il gooni ah ku eegi doonaan, gaar ahaan wuxuu sheegay in daryeeli doonaan dhallaan abaayaashood ku dhinteen difaaca ciidda Puntland.
Howlgalkan lagu sifaynayay koohan katirsan Shabaab, ayaa loogu magac daray Danab, waxaana dowladdu sheegtay inay soo afjareen islamarkaana Puntland laga sifeeyay kooxihii duullaanka ahaa.
GAROWEONLINE
